Ֆրանսիան եվրոգոտում «խնդրահարույց երեխա է», որը չի կատարել իր «տնային աշխատանքը»: Այս մասին Deutschlandfunk ռադիոյին տված հարցազրույցի ժամանակ հայտարարել է գերմանացի քաղաքական գործիչ Միխայել Ֆուքսը` Գերմանիայի Քրիստոնեա-դեմոկրատական միություն կուսակցության խորհրդարանական միության նախագահի տեղակալը:
Գերմանիայի կանցլեր Անգելա Մերկելի կուսակցության երկրորդ մարդու խոսքերով` Փարիզը պետք է մեծացնի աշխատանքային շաբաթը, որը Ֆրանսիայում կազմում է 35 ժամ՝ այն դեպքում, երբ գերմանացիները շաբաթական աշխատում են 40 ժամ, իսկ շվեյցարացիները` 42 ժամ:
Բացի այդ՝ Ֆուքսը Ֆրանսիային խորհուրդ է տվել մեծացնել թոշակային տարիքը: Նրա խոսքերով` գոյություն ունեցող ժողովրդագրական միտումներում նպատակահարմար չէ քաղաքացիներին թոշակի ուղարկել 60 տարեկանում:
Քաղաքական գործչի խոսքերով` եվրոգոտու մյուս խնդրահարույց պետությունները` Իսպանիան, Իտալիան, կատարել են «տնային աշխատանքը» և մրցունակության բարձրացման միջոցներ են ձեռնարկել, իսկ Ֆրանսիայի իշխանությունները հույս ունեին, որ «կանցնի»: