Գերմանիայի նախագահ Յոահիմ Գաուկն անհանգստացած է այն անվստահությամբ, որը առաջանում է մի շարք երկրների մոտ՝ Եվրոպայում ԳԴՀ-ի դերի հետ կապված, և անհիմն է համարում Բեռլինի ճնշումների մասին խոսակցությունները:
Գաուկը, ով Գերմանիայի նախագահի պաշտոնը ստանձնել է անցյալ տարի, առաջին անգամ հանդես է եկել ծրագրային ելույթով: Նրա ելույթն ուղղված է եղել եվրոպական գաղափարների հեռանկարներին:
«Որոշ մարդիկ Անգելա Մերկելին ներկայացնում են որպես պետության ներկայացուցչի, ով ցանկանում է մյուսներին ճնշել: Հակառակը, ես մեր հարևան պետություններին և մեր քաղաքացիներին հավաստիացնում եմ, որ ես Գերմանիայում չեմ տեսնում մի ուժ, որը ձգտում է բռնության: Մինչ այժմ մեր հասարակությունն իրեն բավականին հասուն է դրսևորել: Գերմանիայի Բունդեսթագում չկա և ոչ մի պոպուլիստական կուսակցություն»,- հայտարարել է Գաուկը:
Գերմանիայի նախագահը նաև նշել է, որ ԵՄ երկրներին անհրաժեշտ է առավել սերտ համագործակցություն և հետագա միավորում, քանի որ առանց միասնական ֆինանսական և տնտեսական քաղաքականության, ընդհանուր տարադրամը դժվար թե կարողանա գոյատևել: Նա նաև հավելել է, որ ինտեգրում անհրաժեշտ է ոչ միայն տնտեսության մեջ, այլև պաշտպանության, արտաքին քաղաքականության ոլորտում:
Իր ելույթում Գաուկը խոսել է նաև հունվարին Քեմերոնի հայտարարության մասին, թե Մեծ Բրիտանիան կարող է հանրաքվե անցկացնել ԵՄ կազմից դուրս գալու համար: Նա նշել է, որ ցանկանում է, որպեսզի Մեծ Բրիտանիան մնա իրենց կողքին, և որ իրենք ժողովրդավարության փորձով և իմաստուն երկրի կարիք ունեն։