Վերաքննիչ քրեական դատարանում ավարտվեց Գևորգ Այվազյանի գործով բերված վերաքննիչ բողոքի քննությունը:
Գործը քննվել է Մալաթիա-Սեբաստիա վարչական շրջանի ընդհանուր իրավասության դատարանում Կարեն Ֆարխոյանի նախագահությամբ:
Ըստ մեղադրանքի՝ 26-ամյա Գևորգ Այվազյանը 2014 թվականի մարտի 13-ին «Օդնոկլասնիկի» կայքի միջոցով ծանոթացել է Լոռու մարզի բնակչուհի Շողիկի (անունը փոխված է) հետ: Չարաշահել է նրա վստահությունը, խաբել ու մարտի 18-ից մինչև ապրիլի 5-ը խարդախությամբ հափշտակել է Շողիկի 1 միլիոն 573 հազար դրամը:
Գևորգ Այվազյանին մեղադրանք էր առաջադրվել խարդախության համար՝ ՀՀ քրեական օրենսգրքի 178 հոդվածի 2-րդ մասի 2-րդ կետով:
Ըստ դատական ակտի՝ սարիթաղցի Գևորգ Այվազյանը, վարձակալական հիմունքներով բնակվել է Էրեբունու փողոցում: Նա «Օդնոկլասնիկի» սոցիալական կայքում իր համար ստեղծել է «Լսի դու մի բզբզա» էջը և շփվել է տարբեր կանանց հետ:
2014 թվականի մարտի 13-ին Գևորգն այդ էջի միջոցով ծանոթացել է «Միլենա Միլենա» գաղտնանունով գրանցված լոռեցի Շողիկի հետ:
Նամակագրության ընթացքում, չնայած իր էջի անվանմանը, Գևորգը ներկայացել է որպես ֆրանսահայ մեծահարուստ՝ Վարդան անունով, ասել է, թե Ֆրանսիայում բրենդային ապրանքների երկու մեծ խանութ ունի և Հայաստան է ժամանել ամուսնանալու նպատակով:
Շողիկը հավատացել է Գևորգին, նրան է տվել իր երկու հեռախոսահամարները:
Հեռախոսազրույցների ընթացքում Գևորգը Շողիկին խոստացել է օգնել՝ Վանաձորում հագուստի խանութ բացելու հարցում:
Հետագայում Գևորգը, հասկանալով, որ Շողիկը գայթակղվել է իրենով, լիովին վստահում է իրեն, ձեռնամուխ է եղել նրանից գումարներ հափշտակելու մտադրության իրականացմանը:
Նա 2014 թվականի ապրիլի 7-ին վերադարձնելու պայմանով մաս-մաս Շողիկից ստացել ու հափշտակել է 1 միլիոն 573 հազար դրամ գումար:
Գումարները Շողիկը Երևան է ուղարկել տարբեր տաքսիստների միջոցով, ովքեր փողը Գևորգին են հանձնել Երևանում՝ կրկեսի շրջակայքում կամ Սեբաստիա փողոցում գործող «Էլլա» գիշերային ակումբի մոտ:
Հափշտակելով Շողիկի մեկուկես միլիոն գումարը՝ ապրիլի 7-ից հետո Գևորգը տարբեր պատրվակներով արդեն խուսափել է Շողիկի հետ շփումներից, ապրիլի 30-ից հետո իր կայքէջից չի օգտվել ու անջատել է Շողիկին հայտնի իր հեռախոսահամարը:
Գևորգն ընդհանուր իրավասության դատարանում իրեն լիովին մեղավոր է ճանաչել:
Տուժող Շողիկը Գևորգին հավատացել էր առանց նրա հետ հանդիպելու, առանց նրա դեմքն անգամ տեսնելու:
Ըստ Գևորգի ներկայացրած «հեքիաթի»՝ նրա բանկային քարտերը Հայաստանում «բացվելու էին» ապրիլի 8-ին: Իսկ մինչև այդ՝ Գևորգը պետք է որոշ ֆինանսական հարցեր լուծեր, սակայն կանխիկ ոչ մի դրամ չուներ:
Գևորգը զգացմունքային Շողիկի վրա ազդել է՝ ասելով, թե մոր գերեզմանը պիտի Երևանում կառուցի, ապա հարսնացուի հետ մեկնի Ֆրանսիա: Դրա համար, իբր, նրան կանխիկ գումար էր հարկավոր…
Շողիկի ամսական աշխատավարձը 50 հազար դրամ էր: Նա ամուսնուց թաքուն գրավ է դրել իր ոսկեղենը, գումարը Գևորգի ասած եղանակով՝ տաքսիստների միջոցով, ուղարկել է Երևան:
«Մեծահարուստ» Գևորգին փող ուղարկելու համար Շողիկը ուրիշներից էլ է պարտքեր արել, նույնիսկ բանկերից վարկ է վերցրել, ներկայումս այդ պարտքերի, վարկերի ու տոկոսների տակ է հայտնվել:
Շողիկը դատարանում ասել է, թե Գևորգը եղել է իր առաջին համացանցային ծանոթը…
Գործի բացահայտումից հետո, նախաքննության ընթացքում ու մինչ վերաքննիչում որոշման կայացման օրը տուժողին պատճառված վնասի ոչ մի դրամը չի վերականգնվել:
Գևորգն ու հայրը ապրել են վարձով: Հայրն ասել է՝ եթե որդին չազատազրկվի ու աշխատի, աստիճանաբար կփակի պարտքը, իսկ ներկայումս ինքը ոչինչ չունի, ի վիճակի չէ վնասը միանգամից ամբողջությամբ հատուցել, ինչը պահանջել է տուժողը:
Ընդհանուր իրավասության դատարանը Գևորգ Այվազյանին մեղավոր էր ճանաչել խարդախությամբ տուժողի գումարները հափշտակելու համար և դատապարտել էր 2 տարի 3 ամիս ազատազրկման:
Պատժի սկիզբը՝ 2014 թվականի օգոստոսի 18-ից:
Գևորգ Այվազյանից հօգուտ տուժողի կբռնագանձվի 1 միլիոն 573 հազար դրամ՝ որպես հանցագործության հետևանքով անմիջականորեն պատճառված վնասի հատուցում:
Գևորգ Այվազյանը վերաքննիչ բողոք էր բերել այս դատավճռի դեմ՝ վերաքննիչ դատարանից խնդրելով իր նկատմամբ պայմանական դատապարտություն կիրառել կամ մեղմացնել պատժաչափը:
Վերաքննիչ դատարանում Գևորգի շահերի պաշտպան Վաչագան Քոսյանը պնդեց ու հիմնավորեց ամբաստանյալի բողոքը: Պաշտպանը նշեց, որ տուժողին պատճառած վնասը Գևորգը կարող է հատուցել ազատության մեջ գտնվելով ու աշխատելով, նա չի հրաժարվում այդ գումարը վճարելուց:
Մեղադրող Ալեքսանյանն առարկեց բողոքի դեմ՝ նշելով, թե չէր առարկի, եթե ամբաստանյալը հատուցած լիներ տուժողին պատճառած վնասը: Քանի որ հատուցման ուղղությամբ ոչ մի քայլ չի կատարել, նրա պատիժը մեղմացնելը կամ պայմանական դատապարտություն կիրառելը սխալ կլինի:
Վերաքննիչ քրեական դատարանը՝ Վազգեն Ռշտունի, Արմեն Դանիելյան և Մխիթար Պապոյան կազմով, բավարարեց ամբաստանյալի բողոքը՝ պատժի մեղմացման առումով:
Դատավճիռը փոփոխվեց միայն պատժի մասով: Գևորգ Այվազյանի պատիժը մեղմացվեց 3 ամսով, նա դատապարտվեց 2 տարի ազատազրկման:
