«Բարգավաճ Հայաստան» կուսակցության խորհրդարանական խմբակցությունը ապակենտրոնացվել է և չի ղեկավարվում մեկ կետից: Այս խմբակցության անդամների մի զգալի մասը փետրվարի 12-ի իրադարձություններից հետո հիվանդացել է և չի մասնակցում ԱԺ աշխատանքներին: Խնդիրն այն է, որ խմբակցության անդամների մի զգալի մասը որոշել է որ ինքն այլևս ազատ է իր գործողությունների մեջ և կարող է ընդհանրապես բոյկոտել ԱԺ նիստերը: Եթե նախկինում կուսակցության և խմբակցության ղեկավար Գագիկ Ծառուկյանը կարողանում էր ստիպել պատգամավորներին ներկա գտնվել ԱԺ նիստերին, ապա հիմա ԲՀԿ-ական պատգամավորներն այլևս ազատ են նման վախերից:
Ծառուկյանը, ինչպես նախկինում, այնպես էլ այժմ շարունակում է չգալ ԱԺ, վստահ լինելով որ ԱԺ նախագահ Գալուստ Սահակյանը նրա բացակայությունները հարգելի կճանաչի: Ծառուկյանը այլևս վտանգ չի ներկայացնում իշխանության համար և կարող է հանգիստ լինել իր մանդատի համար: Այնքան հանգիստ, որ նույնիսկ ԱԺ նիստերի ժամանակ նա մասնակցում է հրապարակային միջոցառումների, տոնավաճառի բացում է անում, չնայած իրավունք չունի զբաղվելու բիզնեսով, բայց ԱԺ նիստերին չի մասնակցում: Հետո նա բժշկի տեղեկանք կուղարկի խորհրդարան, և ԱԺ նախագահը կհավատա, որ Ծառուկյանը իսկապես նստաշրջանների օրերին հիվանդ է եղել և նրա բացակայությունները կհամարի հարգելի, ինչը նրա բացառիկ մենաշնորհն է:
Նույն տրամաբանությամբ ԱԺ նիստերին չի մասնակցում մեկ այլ նախկին կարկառուն ԲՀԿ-ական, նախկին արտգործնախարար Վարդան Օսկանյանը: Պարզվում է, որ նա ևս հիվանդ է, ու պարտաճանաչորեն ԱԺ ղեկավարությանը համապատասխան տեղեկանք է ներկայացրել իր հիվանդության մասին: Թե կոնկրետ ինչ հիվանդություն ունի պատգամավոր Օսկանյանը և երբ նա կապաքինվի` անհայտ է, բայց հայտնի է, որ նրա հիվանդությունը սկիզբ է առել փետրվարի 12-ի դեպքերից հետո, և դրանից հետո Օսկանյանն այլևս չի մասնակցում ԱԺ նիստերին: Այդ դեպքերից հետո ԱԺ նիստերին չի մասնակցում նաև Ռուբեն Գևորգյանը, որը նույնպես կարող է անաշխատունակության թերթիկ ներկայացնել:
ԱԺ նիստերին չեն մասնակցում ոչ միայն ԲՀԿ խմբակցության այն անդամները, ովքեր դուրս են եկել կուսակցությունից, այլ նույնիսկ նրանք, ովքեր շարունակում են մնալ խմբակցության կազմում: Խմբակցության գործարար թևի ներկայացուցիչներն իրենց վարքագծով սկսել են կրկնել ՀՀԿ-ական գործարարներին, որոնք խորհրդարանում են հայտնվում միայն իշխանությունների կանչով և միայն որոշակի քվեարկությունների մասնակցելու համար: Նրանց համար ևս մեծ դժվարություն չի ներկայացնի նստաշրջանի ավարտից հետո ԱԺ ղեկավարությանը բժշկական տեղեկանք ներկայացնել հիվանդության մասին և ստանալ հարգելիներ:
Եթե որևէ մեկն ուսումնասիրի հայ պատգամավորների մի մասի ներկայացրած անաշխատունակության թերթիկների քանակը և դրանց ընդգրկման ժամանակաշրջանը, ապա կարող է պարզել որ նրանց մի մասը քրոնիկ հիվանդ է և տարվա մեծ մասը գտնվում է բուժման մեջ: Եվ դա վերաբերվում է ոչ միայն ԲՀԿ-ականներին, այլ նաև ՀՀԿ խմբակցության որոշ անդամների, ովքեր ԲՀԿ-ի ապածառուկյանացումից հետո, իրենց այլևս ազատ են զգում խորհրդարանի նիստերին չմասնակցելու համար, քանի որ առանց իրենց մասկացության էլ խորհրդարանում հնարավոր է քվորում ձևավորել և քվեարկություններ կազմակերպել:
Առաջիկայում ԱԺ-ը բացառապես առողջ և աշխատունակ պատգամավորներով համալրելու համար, ճիշտ կլինի, որ Կենտրոնական ընտրական հանձնաժողովը պատգամավորների թեկնածուներից պահանջի նաև տեղեկանք առողջության մասին: Իսկ այն պատգամավորները, ովքեր մեկ նստաշրջանի ընթացքում ավելի շատ հիվանդ են եղել, քան առողջ` ճիշտ կլինի զրկել պատգամավոր առաջադրվելու և ընտրվելու իրավունքից: Ճիշտ է, դա մարդու ընտրվելու սահմանադրական իրավունքի խախտում է, բայց նոր ընդունվելիք Սահմանադրության մեջ կարելի է կետ մտցնել, որով քրոնիկ հիվանդներին կարգելվի զբաղվել օրենսդրական աշխատանքով, ինչպես որ գործարարությամբ զբաղվողներին է արգելվում:
