«Ժողովուրդ» թերթը գրում է. «Նաիրիտ» գործարանի նախկին աշխատակիցները երեկվանից Կառավարության դիմաց նստացույց են սկսել, որը, ինչպես հայտարարվել է, տևելու է երկու օր: Ճարահատյալ այդ քայլով նրանք ՀՀ Կառավարությունից պահանջում են վճարել իրենց աշխատավարձի կուտակված պարտքերը և վերագործարկել «Նաիրիտը»: Պահանջատեր նաիրիտցիները շուրջ 1700 հոգի են, թեև ոչ բոլորն են մասնակցում ակցիային: Իսկ ինչո՞ւ բանը հասավ նստացույցին:
Բանն այն է, որ այս տարիների ընթացքում ՀՀ իշխանության ներկայացուցիչների թողտվությամբ գործարանը հասցրել է մի քանի հարյուր միլիոն դոլարի պարտքեր կուտակել. տարբեր գնահատականների համաձայն՝ «Նաիրիտի» պարտքերը կազմում են 250-ից մինչև 300 մլն դոլար:
Ի դեպ, ՀՀ էներգետիկայի և բնական պաշարների նախարար Երվանդ Զախարյանն օրերս հայտարարել էր, որ «Նաիրիտի» վերագործարկման համար հենց այդքան` մինչև 300 մլն դոլար է հարկավոր: Սակայն նա միևնույն ժամանակ ասել էր, թե համոզված չեն, որ եթե վերագործարկեն, արդյո՞ք արտադրանքը մրցունակ կլինի, և կկարողանան իրացնել:
Այս կերպ նա, թերևս, փորձել էր արդարացնել ռուսական «Ռոսնեֆտ» ընկերությանը, որը անցած տարի խոստանում էր անհրաժեշտ ներդրումներ կատարել և վերագործարկել «Նաիրիտը», սակայն այս տարվա սկզբից այդ հայտարարությունները մոռացության մատնվեցին և ուղարկվեցին պատմության գիրկը: Իսկ այսօր արդեն, չնայած ՀՀ իշխանությունները չեն խոստովանում, սակայն նկատելի է, որ նրանց միակ ծրագիրը «Նաիրիտի» գույքը գրավի տակից հանելն ու վաճառելն է, որպեսզի աշխատավարձերի պարտքը մարեն: Դրանից հետո նաիրիտցիներն այլևս բողոքելու պատճառ չեն ունենա, և երբեմնի գիգանտն այլևս աննկատ մաս-մաս կվաճառեն, կգնա»:
Մանրամասները՝ թերթի այսօրվա համարում
Լուսանկարը` PAN Photo-ի
