Բրազիլիայում, որտեղ կան շատ վայրի կապիկներ, ապրում են հնաբնակ ցեղեր, որոնց կենսակերպը կարող է շոկի մատնել ժամանակակից մարդուն: Նման ժողովուրդներից են պիրահաները, որոնք չեն մտածում ապագայի մասին, չեն հավատում Աստծուն ու չգիտեն՝ ինչ է ամոթը։ Այս մասին գրում է kulturologia.ru-ն:
Պիրահա ցեղի մասին տեղեկություններ է կազմել քրիստոնյա քարոզիչ Դենիել Էվերեթը, որը 30 տարի առաջ հոգևոր առաքելությամբ ուղարկվել էր Բրազիլիա և նրանց հետ ապրել է 7 տարի։ Այդ ընթացքում նա մանրամասն ուսումնասիրել է պիրահաների լեզուն, մշակույթը, ծանոթացել ավանդույթներին և շատ բան իմացել նրանց աշխարհայացքի մասին:
Այդ հնաբնակների համար տիեզերքը անտառ է, որտեղ նրանք ապրում են, նրանք չեն արձանագրում ժամանակի ընթացքը՝ նրանց մոտ պարզապես բացակայում են ներկան, անցյալն ու ապագան։ Նրանց համար չկա նաև սնվելու ու քնելու ժամ՝ ուտում են, երբ սոված են:
Նրանց մշակույթում չկա պատկերացում թվերի ու հաշվարկի մասին: Պիրահաների թիվը այսօր 700 է: Նրանք չունեն ամոթի ու մեղքի զգացում: Մեծահասակներն ու փոքրերը չեն նեղացնում միմյանց ու չեն չարանում իրար դեմ:
