Արարատի և Վայոց Ձորի մարզերի ընդհանուր իրավասության դատարանում դատավոր Թաթուլ Պողոսյանի վարույթում է Հայկ Բ.-ի գործի քննությունը:
43-ամյա Հայկը վարել է ոստիկանության տնտեսական վարչությանը պատկանող «ՊԱԶ» ավտոբուսը:
Ըստ մեղադրանքի՝ 2014 թվականի օգոստոսի 24-ին, գիշերվա ժամը 3-ին Հայկ Բ.-ն, գտնվելով ալկոհոլ օգտագործած վիճակում, իրեն ամրակցված հիշյալ «ՊԱԶ» ավտոբուսով երթևեկել է Շենգավիթ վարչական շրջանի տարածքով:
Նրան կանգնելու նշան է արել Նելլի Ա.-ն (անունը փոխված է), ով Հայկի վարած մեքենան հասարակական տրանսպորտ է կարծել ու խնդրել է իրեն տանել Շենգավիթ թաղամաս: Հայկը համաձայնել է:
Շուրջ 10 րոպե նա մեքենան վարել է ուղևորուհու նշած ուղղությամբ, բայց հետո նրան առևանգելու դիտավորությամբ չարաշահել է իր՝ որպես հասարակական տրանսպորտային միջոց վարողի նկատմամբ ուղևորուհու ունեցած վստահությունը:
Կինը, ավտոբուսի մեջ տեսնելով գարեջրի դատարկ շշերը, անհանգստացել ու վախեցել է և խնդրել է, որ վարորդը կանգնեցնի ավտոբուսը, իջեցնի իրեն:
Հայկ Բ.-ն անտեսել է կնոջ խնդրանքներն ու պահանջը:
Կինը փորձել է ավտոբուսի դռները բացել վթարային կոճակները սեղմելով, բայց դա նրան չի հաջողվել, որովհետև ավտոբուսի այդ կոճակները չեն աշխատել:
Կինը սկսել է խնդրել Հայկին, որ նա կանգնի, բացի ավտոբուսի դուռը, ասել է, որ ինքը մոլորվել է, տանը հարազատներ ունի, ովքեր սպասում են իրեն, անհանգստանում են:
Հայկն ասել է, թե չի հավատում, նա մեքենայի դուռը չի բացել, կնոջն ասել է. «Դու բռնվեցիր»:
Նա ավտոբուսը վարել է այլ ուղղությամբ, կնոջ կամքին հակառակ նրան տեղափոխել է այլ վայր: Որոշ ժամանակ այդպես վարել է մեքենան, հետո կանգնել է Արարատի մարզի Այնթափ գյուղում գտնվող խանութի մոտ, գնումներ է կատարել, հետո նորից վարել է մեքենան:
Այդ ընթացքում ուղևորուհին, արդեն հուսահատված, մեքենայի մեջ եղած շշով հարվածել է մեքենայի պատուհանին, Հայկը ստիպված բացել է ավտոբուսի դուռը, ու Նելլի Ա.-ն դիմել է փախուստի:
Իսկ մինչև Այնթափ հասնելը, ըստ մեղադրանքի, Հայկը, ուղևորուհու կամքին հակառակ նրա հետ սեռական հարաբերություն ունենալու դիտավորությամբ, մեքենան կայանել է, մոտեցել է Նելլիին, ասել է, թե նա իրեն դուր է եկել, փորձել է բարձրացնել կնոջ զգեստը:
Կինը խնդրել է իրեն ձեռք չտալ:
Հայկը անտեսել է կնոջ խնդրանքը, բռնություն է գործադրել՝ ձեռքերով մի քանի անգամ հարվածել է նրա գլխին, քաշել է մազերից ու պարանոցի շղթայից, փորձել է Նելլիի կամքին հակառակ սեռական հարաբերություն ունենալ հետը, բայց կինը ակտիվորեն դիմադրել է, թույլ չի տվել, որ Հայկը հանի իր զգեստը, ոտքով հարվածել ու մի կողմ է հրել նրան:
Այսպիսով, ըստ մեղադրանքի, Հայկ Բ.-ն իր կամքից անկախ հանգամանքների բերումով չի կարողացել հանցագործությունն ավարտին հասցնել:
Հայկ Բ.-ին մեղադրանք է առաջադրվել հանրորեն վտանգավոր արարքների՝ վստահությունը չարաշահելու եղանակով մարդուն բացահայտ առևանգելու՝ ՀՀ քրեական օրենսգրքի131 հոդվածի 1-ին մասով, և բռնաբարության փորձի համար ՝ ՀՀ քրեական օրենսգրքի 34-138 հոդվածի 1-ին մասով:
