ԱՄՆ ռազմական անօդաչու թռչող սարքեր (ԱԹՍ) մշակող մասնագետները ներկայացրել են նախագծեր, որոնք արտաքուստ կնմանվեն թռչունների ու բզեզների՝ հայտնում է NEWSru.com-ը:
Ինչպես նկատում են սարքերի հեղինակները, նրանք կկատարեն ԱԹՍ-ների գործառույթները՝ կկարողանան թռչել, սողալ, կախված մնալ օդում, նստել էլեկտրալարերին, թափանցել բնակարան:
Ամերիկացի զինվորականների նախագիծը ներկայացրել է The National Geographic-ի լրագրող Ջոն Հորգանը: Վերջինիս խոսքով՝ տեխնոլոգիաների զարգացմանը զուգահեռ՝ այդ անօդաչու թռչող սարքերը պետք է ոչ այնքան տեսանելի լինեն բնապատկերի ընդհանուր ֆոնին:
Նշվում է, որ զինվորականների տրամադրության տակ արդեն կա այդպիսի սարքի մոդել: Այն փորձարկվում է, սակայն լրագրողին արգելել են հետևել փորձնական թռիչքներին:
Դրա փոխարեն Հորգանին ցույց են տվել անիմացիոն տեսանյութ, որում սարքի հեղինակները նկարահանել են, թե, իրենց կարծիքով, ինչպես պետք է գործեն թռչունների ու բզեզների տեսքով անօդաչու սարքերը:
