Թուրքիայի զինված ուժերը հրապարակել են 2015 թվականի մայիսի 1-ի դրությամբ անձնակազմի թվաքանակի վերաբերյալ պաշտոնական տվյալները։ Թուրքական զինուժի անձնակազմը շուրջ 687 հազար մարդ է, որը շուրջ 6000-ով ավելի է 2015 թվականի ապրիլի 1-ի ցուցանիշից, ինչը կապված է շարքային կազմի զորակոչի հետ:
Թուրքիայի զինված ուժերի գլխավոր շտաբի տվյալների համաձայն՝ թուրքական զինուժում գեներալների և ծովակալների թիվը 345 է, որից 312-ը՝ ցամաքային, ռազմաօդային և ռազմածովային ուժերում, 32-ը՝ ժանդարմերիայում, 1-ը՝ առափնյա անվտանգության ուժերում։ Ապրիլի համեմատ գեներալների թիվը չի փոխվել:
Սպաների ընդհանուր թիվը 39.081 է, որից 32.226-ը՝ ցամաքային, ռազմաօդային և ռազմածովային ուժերում, 6233-ը՝ ժանդարմերիայում, 622-ը՝ առափնյա անվտանգության ուժերում։ Սպաների թիվը նախորդ ամսվա համեմատ նվազել է 50-ով։
Կրտսեր հրամանատարական կազմը 96.177 մարդ է, որից 63.632-ը՝ ցամաքային, ռազմաօդային և ռազմածովային ուժերում, 25.062-ը՝ ժանդարմերիայում, 1483-ը՝ առափնյա անվտանգության ուժերում: Այս ցուցանիշը նախորդ ամսվա համեմատ պակասել է շուրջ 600-ով։
Պայմանագրային ժանդարմների թիվը 22.563 է, հատուկ պայմանագրային կրտսեր հրամանատարների թիվը՝ 5000:
Պայմանագրային եֆրեյտորների ընդհանուր թիվը 61. 839 մարդ է, որից 43.906-ը՝ ցամաքային, ռազմաօդային և ռազմածովային ուժերում, 17.244-ը՝ ժանդարմերիայում, 686-ը՝ առափնյա անվտանգության ուժերում։
Շարքային կազմի ընդհանուր թիվը 409.229 մարդ է, որից 291.754-ը՝ ցամաքային, ռազմաօդային և ռազմածովային ուժերում, 115.673-ը՝ ժանդարմերիայում, 1796-ը՝ առափնյա անվտանգության ուժերում։ Այսպիսով, ապրիլի 1-ի տվյալների համեմատ ժամկետայինների թիվն ավելացել է 6000 հոգով, ինչը կապված է պարտադիր զորակոչի հետ։
Քաղաքացիական ծառայողների թիվը Թուրքիայի ԶՈՒ շարքերում 52.844 է, որից 48.476-ը՝ ցամաքային, ռազմաօդային և ռազմածովային ուժերում, 3457-ը՝ ժանդարմերիայում, 911-ը՝ առափնյա անվտանգության ուժերում։
Այսպիսով, Թուրքիայի զինված ուժերի ընդհանուր թվաքանակը 687.089 մարդ է, որից զինծառայողները 634.245-ն են, իսկ քաղաքացիական անձինք՝ 52.844-ը:
Թուրքիայի զինված ուժերում պրոֆեսիոնալ զինծառայող են ընդհանուր թվի 36 տոկոսը։ Ցամաքային, ռազմաօդային և ռազմածովային ուժերում զինծառայողների 34 տոկոսն է պրոֆեսիոնալ հիմունքներով, ժանդարմերիայում՝ 38 տոկոսը, իսկ առափնյա անվտանգության ուժերում՝ 61 տոկոսը։
Նշենք, որ Թուրքիայում գործում է պարտադիր ժամկետային զինծառայություն: Բանակ են զորակոչվում 21 տարին լրացած արական սեռի քաղաքացիները: Պարտադիր զորակոչի հետ մեկտեղ պետականորեն սահմանված գումարը վճարելու դեպքում հնարավոր է լինում խուսափել զորակոչից:
Թեև թուրքական զինված ուժերի անձնակազմի թվի մեջ հաշվում են ժանդարմերիան և առափնյա անվտանգության ծառայությունը, սակայն ոչ պատերազմական պայմաններում այս կառույցները ենթարկվում են Թուրքիայի ներքին գործերի նախարարությանը և իրականացնում նաև ոստիկանական գործառույթներ:
