Վրաստանի վարչապետ Բիձինա Իվանիշվիլին դրական է վերաբերվում 70 տարի առաջ Վրաստանից վտարված Ախալցխայի թուրքերի` Վրաստան վերադարձի հնարավորությանը: Վրաստանի վարչապետ Բիձինա Իվանիշվիլիի և Թուրքիայի վարչապետ Ռեջեփ Էրդողանի՝ Անկարայում կայացած հանդիպումից հետո այս մասին ասել է Իվանիշվիլիի թուրք պաշտոնակիցը: Ուստի, եթե հայրենադարձության ծրագիրն ավարտին հասնի, մսխեթցի թուրքերը կարող են վերադառնալ Վրաստանի հայկական շրջաններ:
Ինչպես «Առաջին լրատվական»-ի հետ զրույցում տեղեկացրեց Վրաստանի «Բազմազգ Վրաստան» կազմակերպության ղեկավար Առնոլդ Ստեփանյանը, թուրքերի հնարավոր վերադարձն այնքան էլ չի նյարդայնացնում ջավախահայերին:
Ըստ նրա՝ դա հայկական Ջավախքի երկու շրջանների՝ Նինոծմինդայի և Ախալքալաքի հետ կապ չունի, թուրքերն այդ շրջաններ չեն վերադառնալու:
«Հնարավոր է վերադառնան միայն Ախալցխայի շրջան, որտեղ 100 հայ կա: Բայց այս դեպքում էլ մեծ մտահոգություն չկա, քանի որ վերադարձի հարցը լուծվում է հայտերի հիման վրա, իսկ դրանք և քիչ են, և, կարծես, ժամկետներն են սպառվել: Մենք այսօր կարող ենք խոսել ընդամենը մի քանի հազար՝ մեկ-երկու հազար թուրքերի վերադարձի մասին: Եթե վերադառնան, Ջավախք չեն վերադառնալու»,- պարզաբանեց վիրահայը՝ հավելելով, որ եթե նույնիսկ վերադառնան, Վրաստանի ամբողջ տարածքով մի քանի շրջանում են սփռվելու:
Հիշեցնենք, որ Ախալցխայի կամ մսխեթցի թուրքերը մինչև 1944թ. բնակվել էին Ջավախքին հարակից մի շարք շրջաններում և Ախալցխայում, հետո արտաքսվել Կենտրոնական Ասիա: Վրաստանի իշխանությունները դեռ 90-ականների վերջին` Եվրոպայի խորհուրդ մուտք գործելու ընթացքում պարտավորվել էին նպաստել մսխեթցի թուրքերի հայրենադարձության գործընթացին, սակայն ապարդյուն: Մոտավոր տվյալներով՝ ներկայումս աշխարհում բնակվում է 300 հազար մսխեթցի թուրք:
Առնոլդ Ստեփանյանը նշեց, որ այս օրերին ջավախահայերին անհանգստացնում է մեկ այլ հարց՝ Ջավախքում նախկին և ներկայիս իշխանության միջև պայքարը: «Վրացական երազանք» կուսակցության ներկայացուցիչները շրջանում ցանկանում են իշխանությունն իրենց ձեռքը վերցնել:
«Այն կլանները, որոնք ղեկավարում էին շրջանը, չեն ցանկանում գնալ, իսկ նոր խմբերը ցանկանում են շանսը բաց չթողնել: «Վրացական երազանք»-ի ներկայացուցիչները մինչև ընտրությունները ակտիվ էին Ջավախքում, այսօր էլ ցանկանում են տեղական իշխանությունը ստանձնել, իսկ նախկին իշխանությունները՝ Սաակաշվիլիի ներկայացուցիչները, չեն ցանկանում ձեռքից բաց թողնել շրջանը: Ուստի նախկին իշխանության ներկայացուցիչները փոխում են կուսակցությունները՝ իշխանության մեջ մնալու համար»,- նկատեց Առնոլդ Ստեփանյանը:
