Բելառուսի իշխանություններն արգելել են զանգվածային լրատվամիջոցներին եթերով ցուցադրել մի շարք երաժիշտների, երաժշտական խմբերի ու գրողների: Արգելվել է նաև նրանց մասին հոդվածների հրապարակումը մամուլում:
Տեղեկատվական արգելանքի տակ են հայտնվել մի քանի ռոք խմբեր, այդ թվում` ДДТ-ն, Նայիվը, Տարականները: Ի դեպ, հիշեցնենք, որ այս խմբերը նախկինում Բելառուսի իշխանություններից պահանջել էին ազատ արձակել դեկտեմբերի 19-ին Մինսկում տեղի ունեցած անկարգությունների մասնակից ընդդիմության ներկայացուցիչներին:
Ընդդիմությանը պաշտպանելու համար բելառուսական ԶԼՄ-ները հանդես գալու իրավունքից զրկվել են նաև ռուսաստանցի հայտնի գրողներ Անդրեյ Բիտովին, Բորիս Վասիլիեւին, Լեոնիդ Ժուխովիցկուն, ինչպես նաև Չեբուրաշկայի արկածների մասին պատմող մանկական ստեղծագործության հեղինալ Էդուարդ Ուսպենսկիին:
Արգելվել են նաև արևմտյան մի քանի խմբերի` Pet Shop Boys-ի, Tru Thoughts-ի, Wah Wah 45-ի և 7 Samurai-ի տեսահոլովակների ցուցադրութունները: Այս խմբերը ևս մասնակցել են բելառուսական ընդդիմությանը պաշտպանող միջազգային շարժմանը:
