Հելսինկյան ասոցիացիայի Վանաձորի գրասենյակի ղեկավար, իրավապաշտպան Արթուր Սաքունցն «Առաջին լրատվական»-ի հետ զրույցում ասաց, որ Վանաձորի բոլոր ընտրատեղամասերի քվեարկության ամփոփման արդյունքներով՝ գործող նախագահ Սերժ Սարգսյանից 2 անգամ ավել ձայն է ստացել «Ժառանգություն» խմբակցության առաջնորդ Րաֆֆի Հովհաննիսյանը:
Անդրադառնալով Ր. Հովհաննիսյանի ֆեյսբուքյան էջի այն գրառմանը, թե Վանաձորից հաղորդում են, որ Կարեն Կարապետյանը հավաքել է Վանաձորի քաղաքապետին, ոստիկանապետին, ազգային անվտանգության պետին, և նրանց հրահանգվել է, որ ոչ մի տեղամասից արդյունքներ չհաղորդեն, և այդ ընտրատեղամասերում մարդիկ պատանդի կարգավիճակում փակված են՝ Ա. Սաքունցն ասաց, որ եթե ինֆորմացիան չի համապատասխանում իրականությանը, ապա ԱԱԾ-ն, ոստիկանապետը, գլխավոր դատախազ Աղվան Հովսեփյանը պետք է հրապարակավ հայտնեն այդ մասին՝ հերքեն նորությունը կամ ապացուցեն, որ նման բան չկա, այլապես՝ հետագա կեղծիքների համար իրենք են պատասխանատու:
