Անցած կիրակի, մեկ շաբաթ անց այն օրվանից, երբ Բենեդիկտոս XVI-ը հայտարարեց իր պաշտոնաթողության մասին, պանտիֆիկը ողջունել է հավատացյալների բազմահազարանոց ամբոխին, ովքեր հավաքվել էին սուրբ Պետրոսի հրապարակում, որպեսզի վերջին անգամ տեսնեին հեռացող Պապին:
Դիմելով ուխտավորներին՝ Բենեդիկտոս XVI-ը կոչ է արել նրանց հիշել, որ Եկեղեցին իրենց մայրն ու ուսուցիչն է, նշել է Աստծուն դիմելու, սիրո մեջ ապրելու և մեծամտությունից և եսասիրությունից ազատվելու անհրաժեշտության մասին, տեղեկացնում է The Los Angeles Times հրատարակչությունը:
Մինչդեռ նոր տեղեկություններ են հայտնվում Պապի առողջական տվյալների վերաբերյալ, որոնք, դիտորդների կարծիքով, Պապի հեռանալու գլխավոր պատճառներն են:
Գերմանացի լրագրող Պետեր Զեևալդը հայտարարել է, որ իրենց վերջին հանդիպման ժամանակ, որը տեղի է ունեցել 10 շաբաթ առաջ, Պապն արդեն սկսել էր ավելի վատ լսել և, հնարավոր է, կուրացել է ձախ աչքով: Նա այնքան է նիհարել, որ դերձակները դժվարությամբ են հասցնում թարմացնել նրա հագուստները, պատմել է Զեևալդը: «Ես երբեք նրան այդքան հյուծված և հոգնած չէի տեսել»,- հայտարարել է լրագրողը Focus-ին:
Լրագրողը մեջբերել է Պապի խոսքերը. «Ես ծեր եմ, ուժերս մարում են: Կարծում եմ, որ ես բավականին գործ եմ արել»: Այն հարցին, թե ինչպես է պատրաստվում անցկացնել իր հանգիստը, Բենեդիկտոսը պատասխանել է, որ դա կախված է իր ֆիզիկական վիճակից:
