Պաղեստինյան ինքնավարության աշխատակազմը ընդհանուր առմամբ պատրաստ է դառնալ անկախ պետության կառավարություն: Այսպիսի եզրակացության են եկել ՄԱԿ-ի մերձավորարևելյան հակամարտության խաղաղ կարգավորման գործընթացի խմբի ներկայացուցիչներն իրենց զեկույցում, որը նվիրված է եղել տարածաշրջանի իրավիճակին:
Այս մասին հաղորդում է France Presse գործակալությունը:
«Այն ոլորտներում, որտեղ ՄԱԿ-ն առավել ակտիվ է աշխատում, ինքնավարության կառավարման համակարգը կարող է լիովին ստանձնել անկախ պետության կառավարման գործառույթները», ասված է փաստաթղթի մեջ:
Միևնույն ժամանակ, զեկույցի հեղինակները նշել են, որ պաղեստինյան պետության ինստիտուտների հետագա ստեղծումը արգելափակվել է Իսրայելի կողմից արաբական հողերի զավթումով և խաղաղ կարգավորման գործընթացում դրական տեղաշարժի բացակայությամբ:
«Պետական ինստիտուտների հետագա ստեղծումը մոտենում է քաղաքական և ֆիզիկական շեմին»,- ասված է փաստաթղթում: Զեկույցի հեղինակներից մեկը` ՄԱԿ-ի մերձավորարևելյան խաղաղ կարգավորման հատուկ համակարգող Ռոբերտ Սերրին, ասել է, որ պաղեստինյան պետության կազմավորման գործընթացը մտնում է վերջնական փուլ: Նրա խոսքերով, եթե Իսրայելը չհամաձայնի «ավելի ակտիվ համագործակցության», ապա գործընթացը ոչ միայն կսառեցվի, այլև վտանգ կա, որ այն կնահանջի:
Սերրիի հայտարարությունը հիմքեր ունի: Ավելի վաղ Պաղեստինյան ինքնավարության ղեկավարները սպառնացել էին, որ եթե պետությունը չկազմավորվի և չճանաչվի մինչև 2011թ.-ի աշուն, Պաղեստինի ղեկավար մարմինները կցրվեն, իսկ զավթված տարածքների ղեկավարման, մատակարարման և անվտանգության ապահովման ամբողջ պատասխանատվությունը կընկնի Իսրայելի ուսերին` որպես բռնազավթող երկիր:
Իսրայելում գործողությունների նման ընթացքն անընդունելի են համարում, որովհետև այն կպահանջի լրացուցիչ ուժերի և ռեսուրսների կենտրոնացում:
Ամենամյա զեկույցը, որը պատրաստվում է Սերրիի և նրա գործընկերների կողմից, նախատեսված է Պաղեստինյան ինքնավար մարզի դոնոր երկրների համար: Այն ներառում է Մերձավոր Արևելքում ներկա իրավիճակի մասին տեղեկություններ և տարածաշրջանում հնարավոր զարգացումների վերաբերյալ ինֆորմացիա:
