Եգիպտոսի նախագահ Մուհամմեդ Մուրսիի որդի Օմարը ԶԼՄ-ներում հայտնված քննադատությունից հետո հրաժարվել է քաղաքացիական ավիացիայի նախարարության ենթակայության ներքո գտնվող ընկերությունում իրեն առաջարկվող պաշտոնից:
Օմար Մուրսիին, ով անցյալ տարի ավարտել ր համալսարանը՝ ստանալով առևտրի ոլորտում բակալավրի աստիճան, առաջարկվել էր աշխատանք Եգիպտոսի օդանավակայանների և ավիահաղորդակցությունների հարցերով ընկերության կադրերի բաժնում: Նախարարության տվյալներով՝ այդ պաշտոնում աշխատավարձը 130 դոլարը չի գերազանցում, սակայն ըստ ԶԼՄ-ների տեղեկությունների՝ երիտասարդ աշխատակցին առաջարկվել էր 5 հազար դոլար աշխատավարձ:
Նախագահի որդու նշանակման լուրն անմիջապես տարածվել էր ողջ երկրում: ԶԼՄ-ներում, սոցիալական ցանցերում քննադատություններ էին տեղացել Օմարի հասցեին, որ նա օգտվում է հոր դիրքից, որ հեշտությամբ ստացել է աշխատանք այն դեպքում, երբ միլիոնավոր եգիպտացիներ տարիներ շարունակ աշխատանք գտնել չեն կարողանում: Նախօրեին այդ նշանակման դեմ ցույցի էին դուրս եկել «Մուսուլման եղբայրները»: Ընդդիմությունը սպառնացել է ցույց անցկացնել քաղաքացիական ավիացիայի շենքի առաջ, եթե այլ որոշում չկայացվի:
Դրանից հետո Օմար Մուրսին հայտարարել է այդ պաշտոնից հրաժարվելու մասին: Նա իր ֆեյսբուքյան էջում նշել է, որ ինքն այդ պաշտոնը ստացել է ընդհանուր հիմունքներով քննություն հանձնելով՝ չնայած նախապես գիտեր, որ երկրում դառնալու է սուտ լուրերի և քննադատության առարկա:
Քաղավիացիայի նախարար Վաել Ալ-Մաադավին հայտնել է, որ այն պաշտոնը, որին հավակնել է երկրի նախագահի որդին, բավականին համեստ է, և աշխատավարձը չի գերազանցում 180 դոլարը, և որ Օմար Մուրսին մասնակցել է քննությանը: Նա նշել է, որ ԶԼՄ-ների արձագանքը բավականին տարօրինակ է, առավել ևս, որ դեռ նշանակման մասին որոշում կայացված չէ:
