Երկուշաբթի օրը լրագրողների հետ շփման ժամանակ Ռուսաստանի նախագահի մամլո քարտուղար Դմիտրի Պեսկովին հարց են տվել այն մասին՝ արդյոք Վլադիմիր Պուտինը տեղյա՞կ է Ղրիմի և Ուկրաինայի վերաբերյալ Ռեջեփ Թայիփ Էրդողանի արտահայտությունների մասին, և արդյոք դրանք «չե՞ն վիրավորել նրան», գրում է Interfax-ը:
«Այսօրվա այլ տեղեկատվության հետ միասին, բնականաբար, նախագահին զեկուցել են նաև այդ մասին»,- ասել է Պեսկովը:
Պատասխանելով այն հարցին՝ արդյոք Էրդողանի արտահայտությունները կարո՞ղ են ազդել Ռուսաստանի և Թուրքիայի հարաբերությունների վրա՝ այդ թվում հաշվի առնելով «Թուրքական հոսք» նախագիծն ու այլ համատեղ ծրագրերը, Պեսկովն ասել է. «Դեռ ոչ, մենք արդեն ասել ենք, որ անկասկած մեր բազմանկյուն համագործակցությունը մեզ համար գլխավոր է: Տվյալ դեպքում հուսով ենք, որ հարաբերությունները նույնքան հաստատուն կզարգանան, ինչպես զարգացել են մինչև այժմ»:
«Մենք շատ համատեղ նախագծեր ունենք, և զբաղվելու շատ բան ունենք»,- ասել է Պեսկովը:
Երկուշաբթի օրը՝ ավելի վաղ, Էրդողանը հայտարարել էր, որ Ռուսաստանը, նախքան 1915 թ. հայերի Ցեղասպանության մասին խոսելը, պետք է հաշվի առնի իր գործողությունները Ուկրաինայում և Ղրիմում:
«Ռուսաստանն առաջին անգամը չէ, որ այս խնդրի վերաբերյալ օգտագործում է ցեղասպանություն բառը: Սակայն այն, ինչը տեղի է ունենում Ուկրաինայում և Ղրիմում, ակնհայտ է, և մինչև Ցեղասպանության մասին խոսելը, նրանք սկզբում պետք է այդ առթիվ բացատրությոններ տան»,- ասել է Թուրքիայի նախագահը:
