Նոր Նորքի 2-րդ զանգվածում, Առևտրի քոլեջում տեղակայված 1/35 ընտրատարածքում, Հրանտ Բագրատյանի վստահված անձ Գոհար Հովհաննիսյանը Aravot.am-ի հետ զրույցում նշել է, որ ընտրատարածքում երկու դեպք են արձանագրել, որ մի քանի քաղաքացի չի մասնակցել քվեարկությանը, բայց նրանց անվան դիմաց արդեն քվեարկած էր: Գոհար Հովհաննիսյանի խոսքերով՝ մի կին գրանցամատյանում նկատել է, որ դուստրերի փոխարեն քվեարկած է. «Նա վստահաբար հայտարարում էր, որ իր աղջիկները բնակվում են Կենտրոնում և ինքը տեղյակ է, որ աղջիկները չեն եկել Մասիվ ու չեն քվեարկել:
Մյուս դեպքն էլ գրեթե նույնն է. հարևանը բացահայտել է, որ իր հարևանի ամբողջ ընտանիքի դիմաց գրանցամատյանում նշված է, որ քվեարկել են: Մինչդեռ այդ կինը վստահեցնում էր, որ իր հարևաններն արդեն մեկ տարի է Հոլանդիայում են: Ընտրատարածքային հանձնաժողովից եկել են և այդ փաստը արձանագրել են»:
Aravot.am-ի հարցին, թե ո՞ր հասցեում է կատարվել, Գոհար Հովհաննիսյանն ասաց, որ կոնկրետ հասցեն այս պահին չի հիշում, բայց խոսքը Թոթովենց փողոցի մասին է: Գոհար Հովհաննիսյանի հավաստմամբ՝ առայժմ Հրանտ Բագրատյանի կենտրոնական շտաբին այս մասին չի տեղեկացրել, օրվա վերջում ամբողջը կամփոփվի ու կտեղեկացվի:
