Վրացական Georgia times կայքի փոխանցմամբ, «Միացյալ Վրաստան» շարժման առաջնորդ Նինո Բուրջանաձեն հայտարարել է, որ երկրում իշխանափոխությունը հնարավոր է միայն հեղափոխական ճանապարհով.
«Քանի դեռ Վրաստանում նախագահում է Սաակաշվիլին, գոյություն ունի իշխանափոխության միայն մեկ ճանապարհ. զանգվածային բողոքներ և դրանով հարկադիր հրաժարականի պարտադրում: Դժբախտաբար, այլ ուղի չկա:
Սակայն ժողովրդական հուզումների ժամանակ Սաակաշվիլին չպետք է կրկնի լիբիական առաջնորդ Մուամար Քադաֆիի սխալները և զենք կիրառի խաղաղ քաղաքացիների դեմ: Եթե զենք կիրառվի, ապա դա կարագացնի նրա վախճանը:
Մենք մտադիր չենք սպասել 2012 թվականի խորհրդարանական ընտրություններին, ինչպես որ Ընտրական օրենսգրքի բարելավման շուրջ իշխանությունների հետ երկխոսության մեջ մտած կուսակցությունների պարագայում է:
Ներկայիս Վրաստանին անհրաժեշտ է հեղափոխություն: Եթե իշխանությունները ժողովրդին այլ ելք չթողնեն, ապա դա տեղի կունենա: Ես դիմում եմ բանակին և ոստիկանությանը, որ այսուհետ ծառայեն ոչ թե իշխանություններին, այլ ժողովրդին»:
Հիշեցնենք, որ ոչ վաղ անցյալում Բուրջանաձեն հայտարարարել էր, թե շուտով Սաակաշվիլին կգնա արտահերթ խորհրդարանական ընտրություններ նշանակելու քայլին: