Երեկ Բելառուսի մայրաքաղաքում տեղի ունեցած պայթյուններից հետո թե՛ բելառուսական և թե՛ համաշխարհային մամուլը քննարկում է այն հարցը, թե ովքե՞ր կարող են կանգնած լինել այս պայթյունների հետևում: Արևմտյան ԶԼՄ-ները գրում են, որ չնայած Լուկաշենկոյի` պայթյունից հետո արած այն հայտարարությանը, որ մեղավորներին հնարավոր է` պետք է դրսում փնտրել, այդուամենայնիվ պայթյունի հեղինակներին անհրաժեշտ է փնտրել հենց երկրի ներսում:
Արևմտյան լրատվամիջոցները գրում են, որ այսօրինակ գործողությունների սովորաբար դիմում են ծայրահեղ իսլամիստները, սակայն դրանց գործունեության համար Բելառուսում նախադրյալներ չկան: The New York Times-ը գրում է, որ շատ հավանական է, որ պայթյունների պատճառը լինի քաղաքական, ոչ թե կրոնական կամ էթնիկական` այնպես, ինչպես դա տեղի է ունենում Ռուսաստանում կամ ՆԱՏՕ-ի անդամ որոշ երկրներում: Թերթը ենթադրում է, որ դա կարող է նաև կապված լինել անցած տարի` դեկտեմբերի 19-ի նախագահական ընտրություններից հետո երկրում սկսված ներքաղաքական լարվածության հետ:
Բելառուսի ներսում որոշ լրատվամիջոցներ ուշադրություն են հրավիրում այն փաստի վրա, որ պայթյունից մի քանի ժամ առաջ նախագահ Լուկաշենկոն խոսել է պայթյունների մասին, որոնք կարող են տեղի ունենալ Բելառուսում: Պետության ղեկավարը նշել է, որ արդեն այսօր շատերը խոսում են այն մասին, որ «կայունությունը Բելառուսում թույլ է տալիս մտածել այն մասին, որ ֆինանսական հիմնական խաղացողները Բելառուսում ունենան պահեստային հարթակներ, այսինքն` մարդիկ այստեղ կբերեն գումարներ, կպահեն այստեղ, կբացեն ընկերություններ, հաշվեհամարներ»:
«Կարևորն այն է, որ մարդիկ սիրում են լռություն, նրանց հանրահավաքներ, ՊԱՅԹՅՈւՆՆԵՐ, կռիվներ պետք չեն: Հենց մի տեղ սկսում են կռվել, գումարները գնում են այդ երկրից: Այդ պատճառով մեզ գնահատում են այն բանի համար, որ մենք երկար ժամանակ կարողացել ենք ապահովել հանգիստ կյանք»,- ասել է Լուկաշենկոն:
