Կիրակի 27 մարդ ձերբակալվել է Հունաստանի հյուսիսում ոսկու հանքերում հրդեհի կազմակերպման կասկածանքով,-հաղորդում է RIA Novosti-ին՝ հղում անելով ոստիկանությանը:
Ըստ իրավապահ մարմինների հաղորդագրությունների՝ գրեթե 50 մարդ դիմակներով ներթափանցել է Խալկիդիկիի ոսկու հանքեր և հրկիզել շենքը, սարքավորումները և տասնյակ ավտոմեքենաներ: Հարձակվողները երկու պահակների վրա բենզին են լցրել և սպառնացել ողջ-ողջ այրել: Պահակներից մեկը ծեծի է ենթարկվել և հոսպիտալացվել, տուժել են ևս երեքը: Հեռանալով՝ հրդեհողները վայր են գցել մի քանի ծառեր, որպեսզի հրշեջներթ դժվարությամբ հասնեն հրդեհի վայր:
2012 թ. Հունաստանի Գերագույն դատարանը թույլ էր տվել գործարկել հանքերը 10 տարվա դադարից հետո, քանի որ դրանք փակ էին գործադուլի պատճառով:
Ներդրող ընկերությունը նշում է, որ դրանց շահագործումից նոր աշխատատեղեր կբացվեն, և բազմամիլիոնանոց ներդրումներ կիրականացվեն: Տեղի բնակիչները հայտարարում են, որ ոսկու հանքերը վնասում են մարդկանց առողջությանը և զբոսաշրջային բիզնեսին:
