Էրեբունի վարչական շրջանի 13/13 ընտրատեղամասում ընտրությունները մեկնարկել են ժամը 8.00-ին: 1823 ընտրողից 160-ը այս պահին ընտրություն է կատարել: Ընտրողների հոսքը մեծ է, գոյացել են հերթեր:
13/13 հանձնաժողովի նախագահ Աշոտ Ափյանը «Առաջին լրատվական»-ի հետ զրույցում նշեց, որ ամեն ինչ բնականոն է, սակայն, ի զարմանս իրեն, այս ընտրություններին ՀՀ նախագահի թեկնածուներից միայն Սերժ Սարգսյանը ունի վստահված անձ, ներկա է նաև մեկ դիտորդ: Քաղաքացիներից մեկի անուն ազգանունը ընտրական ցուցակում այդպես էլ չգտան: Նրան ուղարկեցին դատարան, որտեղից կստանա համապատասխան թուղթ և նոր կկարողանա ընտրելու հնարավորություն ունենալ:
Հայաստանի նախագահի պաշտոնին հավականում է 7 թեկնածու. ՀՀԿ առաջնորդ, Հայաստանի գործող նախագահ Սերժ Սարգսյանը, «Ժառանգություն» կուսակցության ղեկավար Րաֆֆի Հովհաննիսյանը, «Ազատություն» կուսակցության առաջնորդ, նախկին վարչապետ Հրանտ Բագրատյանը, «Ազգայի ինքնորոշում միավորում» կուսակցության նախագահ Պարույր Հայրիկյանը, «Ռադիո հայ» ընկերության խորհրդի նախագահ, քաղաքագետ Անդրիաս Ղուկասյանը, ԼՂՀ նախկին ԱԳ նախարար Արման Մելիքյանը և էպոսագետ Վարդան Սեդրակյանը:
Այս ընտրությունները Հայաստանի նորանկախ պատմության ընթացքում 6-րդ նախագահական ընտրություններ են՝ 1991 թվականին (Լևոն Տեր-Պետրոսյան), 1996 թվականին (Լևոն Տեր-Պետրոսյան), 1998 թվականին (Ռոբերտ Քոչարյան), 2003 թվականին (Ռոբերտ Քոչարյան), 2008 թվականին (Սերժ Սարգսյան):
