Չենք կարող խոսել քարոզարշավում թեկնածուների հավասար հնարավորությունների մասին: Այսօր «Առաջին լրատվական»-ի հետ զրույցում ասաց «Կենտրոն» հեռուստաալիքի քաղաքական մեկնաբան Պետրոս Ղազարյանը՝ ամփոփելով նախընտրական քարոզարշավը:
Նա նշեց, որ եթե խոսում ենք այն մասին, թե արդյոք հեռուստաընկերությունները հավասարաչափ են լուսաբանել, թե ոչ՝ միանշանակ է, որ հիմա շատ ավելի մեծ առաջընթաց կա, խոսքն այսօր շատ ավելի ազատ է, քան Հայաստանի նախորդ բոլոր ընտրություններում: Սակայն, նրա կարծիքով, նույնը չի կարելի ասել թեկնածուների հավասար հնարավորությունների մասին: Նա ընդգծեց, որ այս առումով իշխանական թեկնածուն աչքի էր ընկնում իր ռեսուրսներով:
«Խոսքի ազատության շատ մեծ առաջընթաց կա, թեկնածուներին հնարավորություններ տրվում են, սակայն մնացած բոլոր կողմերից ուժերն անհավասար են, իշխանական թեկնածուն օբյեկտիվ և սուբյեկտիվ պատճառներով ունի շատ ավելի մեծ ռեսուրսներ, լծակներ, քան մյուս թեկնածուները»,- նկատեց Պետրոս Ղազարյանը:
Անդրադառնալով տեսակետներին, թե չկար գաղափարական պայքար՝ չհամաձայնեց դրան: Քաղաքական մեկնաբանը հիշեցրեց, որ «Ազատություն» կուսակցության ղեկավար Հրանտ Բագրատյանն ու «Ժառանգություն» կուսակցության ղեկավար Րաֆֆի Հովհաննիսյանն են ներկայացրել ծրագրեր: «Հետաքրքիր տնտեսական վերլուծություն էր ներկայացրել Հրանտ Բագրատյանը, Րաֆֆի Հովհաննիսյանն է ներկայացրել ծրագրեր: Այսինքն՝ ծրագրեր կան, սակայն ծրագրային պայքար չկա: Ծրագիրը միս ու արյուն է ստանում, երբ մենք տեսնում ենք, որ կա շատ ռեալ մրցակցություն, չկա ռեալ մրցակցություն, ծրագրերն արդեն էական նշանակություն չեն ունենում: Ընտրությունների ժամանակ ծրագրերը միշտ երկրորդական են, էականը եկած մեսիջները, մարդու անցած ճանապարհը, խարիզման, նրա ռեսուրսներն են: Այս ամենի արդյունքումէ որոշվում ընտրությունների արդյունքը»,- նշեց Պետրոս Ղազարյանը՝ շարունակելով, որ ծրագրային մի քանի մեսիջներըբավարար են, որովհետև որևէ ընտրող չի նստում ու լուրջ վերլուծության ենթարկում թեկնածուների ծրագրերը: Վերջինս նաև կարծիք հայտնեց, որ թեկնածուների միջև բովանդակային մրցակցություն չեղավ:
Անդրադառնալով լրատվամիջոցների աշխատանքին՝ ասաց, որ լրատվամիջոցներն ունեին երկու խնդիր՝ լուսաբանել և մեկնաբանել: Նրա մեկնաբանմամբ՝ լուսաբանում եղավ, բայց ոչ մեկնաբանություն:
