Իտալացի դիզայներ Ջորջիո Արմանին քննադատել է գեյերին, ովքեր չափազանց ակնհայտ են ցուցադրում իրենց սեքս կողմնորոշվածությունը, ինչպես նաև գերմարզված տղամարդկանց և պլաստիկ վիրահատություններով տարված կանանց: Միլանցի մոդելյորը այս մասին հայտարարել է Sunday Times պարբերականին տված հարցազրույցում:
«Եթե մարդը հագնվում է, որպեսզի իր տեսքով ցույց տա. «Օ, գիտեք, ես հոմոսեքսուալիստ եմ», ինձ օտար է: Տղամարդը պետք է տղամարդ մնա»,- հայտարարել է համաշխարհային անունով կուտուրյեն, ով երբեք չի թաքցրել իր ոչ ավանդական սեռական նախընտրությունները:
Նա նշել է, որ իրեն դուր չեն գալիս այնպիսի մարդիկ, ովքեր ռելիեֆային մարմին ունենալու համար չափազանց շատ են զբաղվում ֆիտնեսով: «Ինձ դուր են գալիս առողջ, գեղեցիկ կազմվածքով մարդիկ, ովքեր հետևում են իրենք իրենց, բայց ոչ չափազանց»,- իր իդեալը նկարագրել է Արմանին:
Արմանին կանանց խորհուրդ է տվել չփորձել իրենց իրական տարիքից ավելի երիտասարդ երևալ. «Հարկավոր է ծերանալու քաջություն ունենալ»,- ասել է մոդելյորը:
Նա ավելի կտրուկ է արտահայտվել վիրահատական միջոցներով արտաքինը փոփոխելու վերաբերյալ և, մասնավորապես, կրծքի մեծացումը հիմարություն է անվանել: «Ինձ ավելի հաճելի է բնական կանանց նայել»,- ասել է դիզայները:
80-ամյա Արմանիի կարողությունը յոթ միլիարդ եվրո է գնահատվել:
