Աշխարհի ամենահարուստ մարդը՝ մեքսիկացի Կարլոս Սլիմը, ավելի քան 514 միլիոն դոլար է հատկացրել սեփական հեռուստահաղորդակցային ընկերության (America Movil) բաժնետոմսերը գնելու համար՝ բորսայում դրանց գնի կտրուկ նվազման պատճառով: Ինչպես հաղորդում է ITAR-TASS-ը, ընդհանուր առմամբ ձեռք է բերվել 36 միլիոն արժեթուղթ, որոնք արժեզրկվել էին միջազգային շուկայում:
Պաշտոնական տվյալներով` America Movil-ի մեկ բաժնետոմսի գինը հինգշաբթի օրը Մեքսիկայի բորսայում կայացած աճուրդի ժամանակ նվազել է 1.3%-ով: Հատկանշական է, որ դա տեղի է ունեցել այն բանից հետո, երբ հայտարարվել է, որ Մեքսիկայի մրցակցության հարցերով դաշնային հանձնաժողովը 50 միլիոն դոլարով տուգանել է America Movil-ի դուստր ընկերությանը` Telmex-ին:
Հանձնաժողովը նման տուգանք է սահմանել ընկերության գործունեությունում «մոնոպոլ պրակտիկա» կիրառելու համար:
Փորձագետների գնահատմամբ` America Movil-ը բաժնետոմսերի գնի նվազման պատճառով կորցրել է շուրջ 1.2 միլիարդ դոլար: Մեքսիկայի բորսայում ընկերության արժեթղթերը վերջին օրերին ընկել են ավելի քան 10%-ով:
America Movil-ը աշխարհում հինգերորդ բջջային օպերատորն է բաժանորդների թվով:
73-ամյա Կարլոս Սլիմը, ըստ Forbes ամսագրի, արդեն երրորդ տարին է աշխարհի ամենահարուստ մարդկանց ցուցակում գրավում է առաջին տեղը:
