Չեխիայի փոստը կթողարկի հատուկ նամականիշ նորընտիր նախագահ Միլոշ Զեմանի պատկերով: Այս մասին հաղորդում է չեխական CTK տեղեկատվական գործակալությունը՝ վկայակոչելով Չեխիայի փոստի հաղորդակցման բաժնի ղեկավար Իվո Մրավինացին:
«Մենք արդեն ստացել ենք ապագա նախագահի լուսանկարը: Այժմ սկսվել է լուսանկարի վրա աշխատանքը, որը կլինի նոր փոստային նամականիշի հիմքը»,- գործակալությունը մեջբերում է Մրավինացի խոսքը:
Լուսանկարի հեղինակը Չեխիայում հայտնի լուսանկարիչ Միլոշ Օնդրաչեկն է:
Հաստատված ընթացակարգի համաձայն` փոստային նամականիշի մանրակերտը պետք է հաստատի երկրի ընտրված նախագահը, իսկ արտադրվելուց անմիջապես առաջ` արդյունաբերության և առևտրի նախարարությունը և Չեխիայի փոստի ղեկավարությունը:
Չեխիայի նոր նախագահի պատկերով նամականիշը վաճառքի կհանվի ապրիլի վերջին-մայիսի սկզբին:
Հիշեցնենք, որ Միլոշ Զեմանը հաղթել է հունվարին կայացած նախագահական ընտրությունների երկրորդ փուլում: Նրա երդմնակալության արարողությունը տեղի կունենա մարտի 8-ին:
