Երևանի Նորագյուղ թաղամասի բնակիչները «Առաջին լրատվական»-ի հետ զրույցում ընդգծեցին, որ թաղամասը շարունակվում է փլուզվել, տները խարխուլ, կիսաքանդ վիճակում են, բայց վերանորոգել էլ չեն կարող՝ թաղապետարանը թույլ չի տալիս։ Տների մեծ մասը սեփականաշնորհված չէ, բացի այդ՝ բնակիչներին վստահեցնում են, որ թաղամասը իրացվելու և վերակառուցվելու է՝ հենց նոր ներդրող հայտնվի։
«Լուժկովի պաշտոնանկությունից հետո ևս վստահեցնում էին, որ վերակառուցվելու է, քանի որ ներդրողներ կգտնվեն, կամ Մոսկվայի կառավարությունից, կամ Մոսկվայում բնակվող հայ գործարարների շրջանակից: Սակայն մինչև հիմա ներդրումների մասով ոչինչ հայտնի չէ, կարելի է ասել՝ տեր են ման գալիս։ Եթե ներդրում լինի, նոր սեփականաշնորհում ունեցող բնակիչներին իրանց ուզածը կտան, չունեցողներին էլ՝ ինչ-որ բան, բայց իրացումը մենք կտեսնենք, թե չէ՝ դա հարց է»,- ասաց Նորագյուղի բնակչուհի Սվետա Շահինյանը:
Նա նշեց, որ չեն կարողանում սեփականաշնորհման թուղթ հանել, տունը վաճառել. «Պասկևիչյան բլուրի մարդկանցով՝ 40 անձով, ստորագրություն ենք հավաքել, դիմել ենք, որ գազ քաշեն, թաղապետարանն ասում է՝ փող չկա, դուք ձեր միջոցներով քաշեք, այստեղ նույնիսկ կանալիզացիա չկա, տեսեք՝ զուգարանները դրսում են, և սա 21-րդ դարն է»,- դժգոհեց տիկին Սվետան:
Թաղամասի մեկ այլ բնակչուհի՝ Ազգանուշ Կարապետյանը նշեց, որ դիմել են քաղաքապետարան, վարչապետին, նախագահի գրասենյակ, անգամ բարեգործական հիմնադրամներ, այդ թվում՝ «Գագիկ Ծառուկյան» բարեգործական հիմնադրամին, սակայն սայլը տեղից չի շարժվել:
Բնակիչները նաև ընդգծեցին, որ թաղամասի համար շարունակում է խնդիր մնալ տրանսպորտի հարցը. ոտքով քայլում են դեպի ավտոկայան, ում հնարավորությունը ներում է՝ տաքսի է նստում:
Մանրամասները՝ տեսանյութում։
