Վերջին վեց ամսում դոլարի կտրուկ արժեվորումը մյուս արժույթների մեծ մասի նկատմամբ գլխացավանք է դարձել աշխարհի առաջատար բազմազգ կորպորացիաների համար:
Դա նաև հանգեցրել է իրադրության կտրուկ սրման այն երկրներում, որոնք արդեն երկար ժամանակ ապավինում են աշխարհի գրեթե 250 միլիոն միգրանտ աշխատողների դրամական փոխանցումներին, որպեսզի աջակցեն իրենց տնտեսությանը:
Ըստ Համաշխարհային բանկի վերջին զեկույցի, անցյալ տարի վերածնվող դոլարը և ԱՄՆ տնտեսության վերականգնումը բարձրացրին գումարը, որն ԱՄՆ միգրանտները տուն՝ Լատինական Ամերիկա են ուղարկում, մինչդեռ տնտեսական լճացումը Եվրոպայում և Ռուսաստանի նկատմամբ պատժամիջոցները հակառակ ազդեցությունն ունեցան:
Արևելյան Եվրոպայի և Կենտրոնական Ասիայի երկրները, որոնք մեծապես կախված են Ռուսաստանից ստացվող դրամական փոխանցումներից, ամենաշատն են տուժում ռուբլու թուլացումից: Ըստ գնահատումների, դրամական փոխանցումները տարածաշրջանում 2014 -ին նվազել են 6.3 տոկոսով, կազմելով 48 միլիարդ դոլար, մինչդեռ 2013-ին աճել էին 11.1% – ով:
Կանխատեսում են, որ այս տարի էլ դրանք կկրճատվեն ևս 12.7 տոկոսով: 2014-ի վերջին եռամսյակում Ռուսաստանից ԱՄՆ դոլարով փոխանցումները Ուկրաինա կրճատվել են 51 տոկոսով, Ուզբեկստան՝ 43, Հայաստան՝ 31, Տաջիկստան՝ 27, տոկոսով:
Համաշխարհային բանկի գրառումները.
Ռուսաստանի տնտեսության դանդաղեցումը փոխանցումների վրա բացասաբար է ազդում երեք ուղղություններով. (ա), աշխատանքային շատ միգրանտներ կորցրել են իրենց աշխատանքը, իսկ նոր աշխատանք գտնելը ավելի դժվար է դարձել, (Բ) ռուբլու արժեզրկումը նվազեցրել է միգրանտների իրական եկամուտները, դժվարացնելով տուն փող ուղարկելը, (գ) ռուբլու և ԵԿԱ տարածաշրջանի տեղական այլ արժույթների արժեզրկումը նվազեցրել է նաև ամերիկյան դոլարով փոխանցումների արժեքը:
Դրամական փոխանցումները Հյուսիսային Աֆրիկայի երկրներ, մասնավորապես Մարոկկո, Ալժիր և Թունիս, որտեղ Եվրոպան փողը հետ ուղարկելու հիմնական աղբյուրն է, նույնպես տուժել են 2014-ին եվրոյի անկումից:
Դրան հակառակ, անցյալ տարի Լատինական Ամերիկա և Կարիբյան կղզիներ աշխատանքային միգրանտների ուղարկած գումարն աճել է 5.8 տոկոսով: Բայց նույնիսկ այստեղ մեծ տատանումներ կան:
2014 թվականին Մեքսիկա, Էլ Սալվադոր, Գվատեմալա, Հոնդուրաս դրամական փոխանցումների ավելի քան 6 տոկոս աճ է գրանցվել : Այս երկրների միգրանտները հիմնականում հիմնվել են ԱՄՆ-ում: Սակայն, Արգենտինա, Բոլիվիա և Պարագվայ դրամական փոխանցումների աճը դանդաղել է, իսկ Բրազիլիա և Պերու նվազել, և դա մասամբ Իսպանիայի տնտեսական խնդիրների պատճառով, քանի որ այդ երկիրն ընդունում է Լատինաամերիկյան տարածաշրջանի բոլոր միգրանտների մեկ տասներորդին:
Համաշխարհային բանկը ասել է.
Ենթադրվում է, որ ՀՆԱ-ի և Միացյալ Նահանգներում զբաղվածության շարունակվող աճը կխթանի դրամական փոխանցումներին Մեքսիկա և Կենտրոնական Ամերիկա: Մինչդեռ Իսպանիայում գործազրկության բարձր մակարդակի պատճառով, ամենայն հավանականությամբ, կկրճատվեն փոխանցման հոսքերը Բոլիվիա, Կոլումբիա, Պարագվայ և Պերու:
Սպասվում է, որ հակասությունների ու տնտեսական խնդիրների առկայության դեպքում էլ աշխատողների արտահոսքը կշարունակվի, դրամական փոխանցումներն էլ կավելանան և 2014-ի 436 միլիարդից 2017 -ին կհասնեն 479 միլիարդի:
Թարգմանությունը՝ Interpress.am-ի
