Ինչպես տեղեկացնում է ՀՖՖ մամուլի ծառայությունը, այսօր ՀՖՖ տեխնիկական կենտրոնում՝ ֆուտբոլի ակադեմիայում, տեղի ունեցավ ՀՖՖ ակումբների արտոնագրման համակարգի ֆինանսական չափանիշին նվիրված սեմինար-հանդիպում, որը կազմակերպել և անցկացնում էր ՀՖՖ Արտոնագրման բաժինը փետրվարի սկզբին ՈւԵՖԱ-ի Ֆինանսական արդար խաղի բաժնի կողմից կազմակերպված սեմինար-հանդիպմանը մասնակցելուց և hամապատասխան պահանջներին ծանոթանալուց հետո:
Սեմինարը կազմակերպվել էր Հայաստանի Ֆուտբոլի Բարձրագույն խմբի բոլոր ակումբների համար: Ներկայացված էր նաև «Ալաշկերտ» ֆուտբոլային ակումբը, որը եւս կփորձի 2013/2014 թթ. մրցաշրջանից սկսած՝ ներգրավվել ՈւԵՖԱ-ի Ակումբների արտոնագրման եւ ֆինանսական արդար խաղի համակարգին: Սեմինարին մասնակցում էին բոլոր ակումբների արտոնագրման պատասխանատուները և հաշվապահները:
Շատ կարևոր էր, որ սեմինարին մասնակցում էին նաև «Բեյքեր Թիլլի Արմենիա» միջազգային աուդիտորական ընկերության ներկայացուցիչները, ովքեր հետագայում պետք է անցկացնեն ֆինանսական աուդիտներ ՈւԵՖԱ-ի արտոնագրային գործընթացին մասնակցող ակումբներում՝ համապատասխան ՈւԵՖԱ-ի կողմից սահմանված պահանջների:
Սեմինարը նպատակ էր հետապնդում ներկաներին ծանոթացնել ՈւԵՖԱ-ի ակումբների արտոնագրման համակարգի և ֆինանսական արդար խաղի վերջին նորամուծություններին և տենդենցներին:
Այն հիմնականում վերաբերում էր ՈւԵՖԱ-ի ակումբների արտոնագրման և ֆինանսական արդար խաղի 2012 թվականի կանոնակարգում տեղ գտած արտոնագրման համակարգի ֆինանսական չափանիշի պահանջներին վերաբերող փոփոխություններին: Սեմինարի ընթացքում ներկայացվեցին նաև ֆինանսական արդար խաղի կիրառելիությունն ու դրանում առկա պահանջները, որոնք պետք է ուժի մեջ մտնեն 2013/14 թվականների մրցաշրջանում:
Սեմինարի ընթացքում և ավարտից հետո ակումբների ներկայացուցիչներն ակտիվորեն քննարկեցին ֆինանսական չափանիշի խնդիրներին վերաբերող բազմաբնույթ հարցեր և ստացան իրենց հուզող մի շարք հարցերի պատասխանները:
Լուսանկարը՝ ՀՖՖ մամուլի ծառայության:
