Թուրքիայի վարչապետի գլխավոր խորհրդական Էթիեն Մահչուփյանը թուրքական «Հյուրիյեթ» պարբերականի հետ զրույցում մեկնաբանել է իր զբաղեցրած պաշտոնից հեռացման տեղեկությունները:
Նա նշել է, որ դեռ մարտի 9-ին նրա զբաղեցրած պաշտոնի հետ կապված փոփոխություններ են եղել, որոնք ավտոմատ էին և վաղուց էին նախատեսված երկրի օրենքներով: Հարցն այն է, որ Մահչուփյանի տարիքի հետ կապված փոխվել է աշխատանքի պայմանները: Նա շարունակել է զբաղեցնել վարչապետի խորհրդականի պաշոնը նոր կարգավիճակով և նոր պայմաններով, ինչի հետևանքով նա այլևս պետության կողմից աշխատավարձ չի ստանալու:
Մահչուփյանը նշել է, որ ներկայում արտասահմանյան գործուղման է, իսկ իր կարգավիճակը փոփոխությունն ավտոմատ կերպով կատարվել է դեռևս մարտի 9-ին:
Ավելի վաղ թուրքական աղբյուրները գրում էին, թե Թուրքիայի իշխող «Արդարություն և զարգացում» կուսակցությունը Մահչուփյանի հեռացնելու պատճառաբանությունը կապել է վերջինիս՝ պաշտոնի հետ տարիքի անհամապատասխանությամբ, թեև իրական պատճառը նրա՝ Հայոց ցեղասպանության մասին հայտարարությունն է, ինչի պատճառով վերջին շրջանում նրա հասցեին խիստ քննադատություններ էին հնչեցնում ԱԶԿ-ի տարբեր ներկայացուցիչներ։
Նշենք, որ Էթիեն Մահչուփյանն ուշագրավ հայտարարություններով մեկնաբանել էր Հռոմի պապ Ֆրանցիսկոսի մատուցած պատարագը, որի ժամանակ վերջինս 20-րդ դարի սկզբում թուրքերի կողմից հայերի զանգվածային կոտորածն անվանել էր իր անունով՝ Հայոց ցեղասպանություն:
Մահչուփյանը ասել էր, որ «եթե հարցին տեխնիկական տեսանկյունից մոտենանք, մեր օրերում արդեն անհնար է ասել, որ 1915-ին ցեղասպանություն չի եղել»:
