«Չեմ կարծում, որ ՀՀՇ-ն կարիք ուներ անվանափոխության: Եկեք չմոռանանք, որ այն 3-րդ անկախ հանրապետության իշխող կուսակցությունն էր և իր բոլոր դրական ու բացասական դերակատարություններով հանդերձ՝ պատմական կուսակցություն է: ՀԱԿ կուսակցության ստեղծման նախաձեռնությունը պայմանավորված է ժամանակի ու իրավիճակի թելադրանքով, չեմ ուզում մեկնաբանել, թե ինչ ժամանակի ու ինչ իրավիճակի, բայց կարծում եմ՝ մենք բոլորս փորձում ենք լուծումներ գտնել, որի միջոցով ավելի արդյունավետ կարող է գործել ընդդիմադիր շարժումը»,- Aravot.am-ին ասաց Աժ ՀԱԿ պատգամավոր Լյուդմիլա Սարգսյանը՝ անդրադառնալով պարոն Մակեյանի երեկվա դիտարկումներին, թե ստեղծվելիք ՀԱԿ կուսակցությունը ՀԱԿ-ի կենտրոնական գրասենյակի չինովնիկների համար է ստեղծվում, որովհետև նրանք բարդույթներ ունեն ՀՀՇ մտնելու հարցում:
«Պետրոսի և մեր Հայ ազգային կոնգրեսի քաղխորհրդի միջև ինչ-որ անհամաձայնություն է տեղի ունեցել, մի փոքր շատ են առաջ գնացել այդ թեմայով: Հնչեցրած կարծիքներն այնքան էլ իրականությանը չեն համապատասխանում: Եվ կարծում եմ՝ Պետրոս Մակեյանը մի փոքր ծայրահեղացրել է վիճակը, և այն մեկնաբանությունները, որ տալիս է ՀԱԿ կուսակցության ստեղծման նպատակների վերաբերյալ, այդ կարծիքը չեմ կիսում: Քաղխորհուրդն այլևս այն դերակատարությամբ և միասնականությամբ որոշումներ չէր ընդունում, այլևս այդ վիճակով չի կարող շարունակվել՝ անարդյունավետ է դաոնում մեր աշխատանքը: Որ ընդդիմադիր շարժման աշխատանքն ավելի արդյունավետ դարձնենք ու որոշումների ընդունումն ավելի նպատակային, իրավիճակը պահանջում է, որ համակիրներն ու ակտիվիստները ավելի համախմբվեն ու ավելի նպատակային պայքար մղեն համակարգի դեմ»,- շարունակեց տիկին Սարգսյանը:
Հակադարձելով պարոն Մակեյանի պնդումներին, թե ՀԱԿ-ին ճգնաժամից հանելու իր կուսակցության կազմած փաթեթը երբ փորձեցին քննարկման ներկայացնել, պարզեցին, որ Կոնգրեսում քննարկումից, հրապարակային խոսելուց ավելի շատ են վախենում, ասաց. «Պետրոսը վաղուց քաղխորհրդում չի եղել, այսօր ենթադրությունների վրա է կառուցում իր կարծիքը: Քաղխորհրդի բոլոր անդամները և ես երեկ ցանկանում էինք տեսնել այն բարեփոխման ծրագիրը, որի մասին ամիսներ շարունակ խոսում է: Թող բերեր և ներկայացներ քաղխորհրդի դատին, միգուցե այդ նախաձեռնությունը մեզ համար ընդունելի լիներ, և փորձեինք այդ բարեփոխման ծրագիրն արդիականացնել և այդ ուղղությամբ աշխատանք տանել: Նա չներկայացավ, ինչպես նաև մի քանի մարդիկ, որոնք այդ գիծը պահում էին, և մենք այդպես էլ չիմացանք՝ ինչ ծրագրի մասին է խոսքը: Կառուցողականությունն այս իրավիճակում ավելի կնպաստի մեր ուժեղացմանը, քան թե տարանջատումը: Քննարկումից երբեք չենք վախեցել, նույնիսկ մի քանի անգամ հայտարարել ենք՝ եթե այն իրատեսական ու կիրառելի է, պատրաստ ենք ընդառաջ գնալ: Սկսում եմ մտածեք միգուցե այդ փաթեթը չկա՞»:
