WIN/Gallup International նոր հետազոտության տվյալներով՝ կազմվել է աշխարհի ամենակրոնասեր բնակչությունն ունեցող երկրների քարտեզը՝ հայտնում է The Telegraph-ը։
Հայաստանն այդ վարկանիշում երկրորդն է՝ 93 տոկոս ցուցանիշով։ Առաջին տեղում Թաիլանդն է (94 տոկոս): Երկրորդ հորիզոնականը Հայաստանի հետ կիսում են Բանգլադեշը, Վրաստանն ու Մարոկկոն։
Ինչ վերաբերում է ամենից քիչ կրոնասեր բնակչություն ունեցող երկրներին, վերջին տեղում Չինաստանն է՝ 7 տոկոս։
Հեռախոսով և առցանց անցկացված հետազոտությանը մասնակցել է 64 երկրից 64 հազար մարդ։ Մոլորակի բնակիչների 2/3-ն իրեն կրոնասեր է համարում։ Հետազոտության տվյալներով՝ երիտասարդներն ավելի կրոնասեր են, քան տարեցները։ WIN/Gallup International-ի հետազոտությունից պարզ է դառնում, որ մինչ 34 տարեկան չափահասների 2/3-ը կրոնասեր է։ Մնացած բոլոր տարիքային խմբերի համար միջինը կազմում է 60 տոկոս։ Կրթություն չունեցողներն ամենակրոնասերն են՝ 80 տոկոս։
Երկրագնդի մայրցամաքների մեծամասնությունն իրեն համարում է կրոնասեր։ Միայն Ավստրալաիա և Արևմտյան Եվրոպա տարածաշրջաններն են, որտեղ անհատների 44 և 43 տոկոսն են իրենց կրոնասեր համարում։
Հետազոտությունն անցկացվել է այն բանից հետո, երբ անցած ամիս Pew Research Centre-ը հայտարարեց, որ իսլամը 2100 թվականին կլինի աշխարհում գերիշխող կրոն։
