Տաջիկստանի նախագահ Էմոմալի Ռահմոնն այսօր Դուշանբեում ընդունել է ՄԱԿ-ի մշտական համակարգող, Տաջիկստանում ՄԱԿ-ի ծրագրերի զարգացման մշտական ներկայացուցիչ Ալեքսանդր Զուևին: Այս մասին հայտնում է տեղի Avesta լրատվական գործակալությունը:
Պետության ղեկավարի մամլո ծառայության փոխանցմամբ՝ հանդիպման ընթացքում փաստվել է, որ ԱՊՀ տարածքում ամենաակտիվ գործունեությունը ՄԱԿ-ն իրականացնում է հենց Տաջիկստանում:
Այսօր Տաջիկստանում իրականացվում են կրթական, առողջապահական, գյուղատնտեսական, ժողտնտեսության, ջրամատակարարման ոլորտների նախագծեր:
Կողմերը հատուկ ուշադրություն են դարձրել առողջապահական ոլորտում համագործակցությանը, որի շնորհիվ երեխաների մահացության դեպքերը նվազել են՝ հատկապես նորածինների շրջանում, ինֆեկցիոն հիվանդությունների դեպքում:
Կողմերի կարծիքով՝ զգալի է նաև համագործակցությունը ականազերծման և պայթուցիկ այլ նյութերից Տաջիկստանը «մաքրելու» հարցում: Ներկայում պայթուցիկներից զերծ է Տաջիկստանի տարածքի 85 տոկոսը:
Զրուցակիցները քննարկել են նաև օգոստոսին Դուշանբեում ՄԱԿ-ի հովանու ներքո անցկացվելիք ջրի գլոբալ խնդրին նվիրված բարձր մակարդակով միջազգային կոնֆերանսի նախապատրաստության հարցերը:
