Ադրբեջանական SalamNews.org կայքի փոխանցմամբ, հունիսի 12-ին կայանալիք խորհրդարանական ընտրություններից առաջ Թուրքիայի «Ազգայնական շարժում» կուսակցությունն (ԱՇԿ) իր նախընտրական քարոզարշավի շրջանակներում շրջանառության մեջ է դրել մի տեսանյութ:
Դրանում վստահեցվում է, որ եթե վարչապետ Էրդողանի գլխավորած «Արդարություն ու զարգացում» կուսակցությունը (ԱԶԿ) նորից հաղթի, ապա կշարունակվի հայերի ու քրդերի նկատմամբ տարվող երկակի ստանդարտների քաղաքականությունը, իսկ Ադրբեջանը նորից հարված կստանա թիկունքին: Մինչդեռ եթե հաղթի ԱՇԿ-ն, ապա Ղարաբաղը «կազատագրվի», և այնտեղ «նորից կշողշողա» ադրբեջանական դրոշը:
Հիշեցնենք, որ թուրքական խորհրդարանում հայտնվելու համար քաղաքական կուսակցություններից պահանջվում է հաղթահարել նախընտրական 10 տոկոսանոց արգելքը:
Ներկայումս Թուրքիայում անցկացված հարցախույզները ցույց են տալիս, որ երկրի երրորդ գլխավոր ուժ հանդիսացող ԱՇԿ-ն հունիսի 12-ին կայանալիք խորհրդարանական ընտրություններում գոյատևման պայքար է մղելու: Դրա համար էլ շահարկելով ղարաբաղյան հակամարտության թեման` ԱՇԿ-ն ձգտում է գրավել Թուրքիայում մեծաթիվ ադրբեջանական համայնքի ընտրազանգվածը:
