ՀՀ նախագահի թեկնածու, «Ժառանգություն» կուսակցության առաջնորդ Րաֆֆի Հովհաննիսյանի նախընտրական հանդիպումը Գյումրիում մարդաշատ էր՝շնորհիվ ԲՀԿ ընտրազանգվածի: Այսօր «Առաջին լրատվական»-ի հետ զրույցում նման տեսակետ հայտնեց գյումրեցի քաղաքագետ Գագիկ Համբարյանը՝ անդրադառնալով ՀՀ նախագահի թեկնածու Րաֆֆի Հովհաննիսյանի՝ Գյումրիում անցկացրած նախընտրական հանդիպմանը:
Նա նշեց՝քանի որ ԲՀԿ-ն չունի իր սեփական թեկնածուն, ԲՀԿ ընտրազանգվածի ձայները կբաշխվեն նախագահական ընտրություններին մասնակցող այլ քաղաքական ուժերի միջև:
Ըստ Գ. Համբարյանի՝ ԲՀԿ-ում կան ուժեր, որոնքերբևիցե չեն պաշտպանի ՀՀ գործող նախագահի թեկնածությունը.դա ընդդիմադիր այն հատվածն է, որը չէր ցանկանում, որ ԲՀԿ-ն համագործակցեր իշխանությունների հետ:Սա հասարակության այն հատվածն է, որը մասնակցել էր Րաֆֆի Հովհաննիսյանի հետ հանդիպմանը: Թեև քաղաքագետը շեշտեց, որ Գյումրիում «Ժառանգություն» կուսակցության առաջնորդ Րաֆֆի Հովհաննիսյանն ընտրազանգված ունի, ուստի հանդիպմանն իր համակիրները ևս եղել են:
«Գյումրին, լինելով ՀՀ երկրորդ քաղաք, միշտ էլ իր ուրույն կարծիքն է ունեցել նախագահական ընտրություններին, ուստի, կարծում եմ, Րաֆֆի Հովհաննիսյանը բավական շատ ձայներ կտանի Գյումրիից: Այն մարդիկ, ովքեր դժգոհ են իշխանությունից, կքվեարկեն Րաֆֆի Հովհաննիսյանի օգտին»,- կարծիք հայտնեց Գագիկ Համբարյանը: Նա բացառեց, որ «Ժառանգության» առաջնորդի հանդիպումը կայացած լիներ ԲՀԿ Գյումրիի կառույցների աջակցության շնորհիվ:
Հիշեցնենք, որ ՀՀ նախագահի թեկնածու Րաֆֆի Հովհաննիսյանը` տիկնոջ հետ, փետրվարի 10-ին նախընտրական ծրագիրն ու անելիքները գյումրեցիներին ներկայացնելու նպատակով հանրապետության երկրորդ քաղաքում էր:Երեկոյան նա գյումրեցի ընտրողների հետ էր հանդիպել Վ. Աճեմյանի անվան պետական դրամատիկական թատրոնում: Հանդիպումը բավական մարդաշատ էր:
