Թուրքական «Զաման» թերթի սյունակագիր Յավուզ Բայդարն իր «Անկարան ապրիլի 24-ին կզարմացնի՞ աշխարհին» վերտառությամբ հոդվածում անդրադառնում է Հայոց ցեղասպանության, Թուրքիայի ժխտողականության, ապրիլի 24-ի սպասումների թեմաներին:
«Լավ, մարդիկ, ապրիլը եկավ: G-word-ի («ցեղասպանություն» բառի-խմբ.) սեզոնն է, սակայն այս անգամ ավելի ուժեղ զանգով է այն հնչում: Ամոթի մեծագույն հատորներից մեկն այս հողերի ղեկավարների կողմից գրվեց 100 տարի առաջ, իսկ 100 տարի անց հայերի սրտերում և մտքերում վերքերը շարունակում են բաց մնալ: Շատերն են հետաքրքրությամբ սպասում, թե արդյոք պաշտոնական Անկարան կցուցաբերի՞ որոշակի ափսոսանք, զղջում հայերի հիշատակի միջոցառումների նկատմամբ»,- նշում է հեղինակն ու հավելում. «Հետաքրքիր է տեսնել օսմանյան բանակի և նրան աջակցող ավազակախմբերի, թուրքերի, քրդերի, այլոց կողմից մի շարք ցեղասպանական գործողությունների հետևանքով հայերի ողբերգության նկատմամբ Անկարայի վերաբերմունքը»:
«Արդյոք թուրքական կառավարությունը որոշակի պատասխանատվություն կկրի՞ համակարգված, ագրեսիվ ժխտողականության և խոշոր կեղծիքի համար, որը վերաբերում է 1915-18թթ. մարդկության դեմ հանցագործություններին»,- գրում է Յավուզն ու հավելում. «Թուրքիայի ճնշող մեծամասնությունը, կարծես, անտարբեր է այս տարելիցի նկատմամբ: Սակայն Անկարայի համար ապրիլի 24-ը շարունակում է գերիշխել օրակարգում՝ արդյոք ԱՄՆ նախագահ Բարաք Օբաման կարտասանի՞ Ցեղասպանություն բառը: (Անկարայի համար) ուրիշ ոչինչ կարևոր չէ»,- գրում է հեղինակը:
Այնուհետև Յավուզ Բայդարը կանգ է առնում Գալիպոլիի ճակատամարտի 100-ամյակն ապրիլի 24-ին նշելու Թուրքիայի որոշման վրա:
«Էրդողանի որոշումը՝ Գալիպոլիի ճակատամարտի 100-ամյակը նշել ապրիլի 24-ին, այլ ոչ մարտի 18-ին, ինչպես ավելի վաղ է, մեծ հաճույքով ընդունվեց Թուրքիայի բոլոր ժխտողական շերտերի, ազգայնական խմբերի կողմից»,- գրում է հեղինակը և եզրահանգում, որ Հայկական հարցի տեսանկյունից Թուրքիան լուրջ փոփոխությունների չի ենթարկվել և շարունակում է նախկին ժխտողական քաղաքականությունը:
«Ինչպես նշում է Թուրքիայում հայ լրագրող Արիս Նալջըն՝ «պաշտոնական Թուրքիան կրկին գործարանային կարգավորումներին է վերադարձել», այսինքն՝ կրկին շարունակում է Ցեղասպանության ժխտումը»,- գրում է թուրք հեղինակն ու հավելում. «Վերջին շրջանում թուրքական լրատվական աղբյուրներում միանման լուրեր էին տարածվում այն մասին, թե ԱՍԱԼԱ ահաբեկչական կազմակերպությունը (Հայաստանի ազատագրության հայ գաղտնի բանակը-խմբ.) վերածնվել է և սպառնում է խանգարել Գալիպոլիի միջոցառումները: Ինչևէ, այս տեղեկությունը ևս ավելի նման է կեղծիքի…»:
Հավելենք, որ Թուրքիայի նախագահ Թայիփ Էրդողանը հունվարի 18-ին Անկարա այցելած Ադրբեջանի նախագահ Իլհամ Ալիևի հետ համատեղ ասուլիսում հայտարարել էր, թե թուրքական կողմը պատրաստվում է Դարդանելի ճակատամարտի (հայտնի է նաև Չանաքքալեի, Գալիպոլիի պատերազմ) 100-րդ տարելիցը նշել ապրիլի 24-ին, ինչի կապակցությամբ 102 երկրների ղեկավարների պաշտոնական հրավերներ են ուղարկվել՝ Թուրքիայում նշելու այդ իրադարձությունը: Էրդողանի կողմից հրավիրվածների թվում է նաև ՀՀ նախագահ Սերժ Սարգսյանը, որը պատասխան նամակով արդեն հրաժարվել է Դարդանելի ճակատամարտին նվիրված միջոցառումներին մասնակցությունից, ինչպես նաև նշել հրաժարվելու պատճառները:
Այսպիսով՝ Էրդողանն իր այս հրավերով նախևառաջ մերժել է ՀՀ նախագահի՝ ավելի վաղ իրեն ուղարկված հրավերը՝ ապրիլի 24-ին այցելելու Ծիծեռնակաբերդ և միասին հարգելու Ցեղասպանության զոհերի հիշատակը:
Դարդանելի ճակատամարտի 100-ամյակն ապրիլի 24-ին նշելու Էրդողանի որոշումը միմիայն կապված է Հայոց ցեղասպանության զոհերի հիշատակի օրվա հետ, քանի որ ապրիլի 24-ը Դարդանելի գործողության տեսանկյունից առանձնացող և նշանավոր օր չէ: Նախկին տարիներին Թուրքիայում Դարդանելի գործողության տարելիցը նշել են մարտի 18-ին:
