Տագնապալի հաղորդագրություններ են ստացվում Մեքսիկական ծոցում կանգ առած Carnival Triumph նավից, որը 4200 մարդու համար վերածվել է լողացող բանտի: Կիրակի նավի վրա հրդեհ էր բռնկվել, ինչից հետո շարժիչները շարքից դուրս էին եկել: Էլեկտրաէներգիայի անջատման հետևանքով դադարել էր գործել նաև կենսապահովման բորտային համակարգը: Անձնակազմի անդամներից և ուղևորներից ոչ ոք չի տուժել, սակայն արդեն 4-րդ օրը կանգ առած նավում մարդիկ գտնվում են սոսկալի պայմաններում, որոնք ժամ առ ժամ վատթարանում են: Քարշակները նավը ԱՄՆ կվերադարձնեն միայն հինգշաբթի: Այս մասին հայտնում է The Daily Mail-ը:
Ուժեղ հոսանքը նավը բավականին հեռացրել է ափից: Ուղևորները կարողացել են կապվել հարազատների հետ և տեղեկացնել իրադրության մասին: Շնորհիվ երկվորյակ նավի՝ Carnival Legend-ի մոտ գտնվելու ուղևորներին հավելյալ սնունդ է մատակարարվել: Մոլեգնած մարդիկ ծեծկռտուք են սարքել սննդի համար: Նրանք ստիպված են սնվել սոխով ու վարունգով սենդվիչներով:
Խցերում անտանելի շոգ է, ուղևորնրը քնում են տախտակամածին տեղադրված վրաններում: Մեկ այլ խնդիր են դարձել չաշխատող զուգարանները: Միզել են նավի կարպետների վրա, իսկ նավի պատերից կեղտ է հոսում:
Carnival Triumph-ը շրջագայությունը սկսել էր Տեխասի Գալվեսթոն նավահանգստից՝ փետրվարի 7-ին, և պետք է վերադառնար այնտեղ երկուշաբթի, սակայն երկուշաբթի անհայտ պատճառներով տեղի ունեցած վթարը կանգնեցրել է նավի տեղաշարժը մեքսիկական Յուկատան թերակղզու ափից 240 կմ հեռավորության վրա:
