Հունվարի 24-ին Երուսաղեմի հայոց պատրիարք ընտրված Լուսարարապետ Նուրհան արքեպիսկոպոս Մանուկյանն իրավականորեն չի ստանձնել պատրիարքի աթոռը: Վերջինիս պատրիարքի ճանաչում դեռևս չեն շնորհել ո՛չ Իսրայելի, ո՛չ Հորդանանի, ո՛չ Պաղեստինի կառավարությունները: Այս մասին «Առաջին լրատվական»-ի հետ զրույցում ասաց Երուսաղեմի հայոց պատրիարքի տեղապահ Արիս արքեպիսկոպոս Շիրվանյանը: Նա տեղեկացրեց, որ սպասողական վիճակում են:
«….Երևի բյուրոկրատական հարցեր են: Հուսով եմ, որ խոչընդոտներ չեն լինի, քանի որ խոչընդոտների պատճառ չկա: Սա առաջին անգամն է, որ երեք կառավարություններ պետք է հաստատեն: Նախորդիվ՝ 1990 թվականին հանգուցյալ Թորգոմ պատրիարքի ընտրության հաստատման կապակցությամբ երկու կառավարություն էին, հիմա Պաղեստինն էլ է ավելացել: Այն ժամանակ Իսրայելը շուտ հաստատել էր, բայց Հորդանանը փոքր-ինչ ուշացել էր»,- պարզաբանեց նա՝ հույս հայտնելով, որ շուտով երեք կառավարություններն էլ կարձագանքեն:
Ավելի վաղ Արիս արքեպիսկոպոս Շիրվանյանն «Առաջին լրատվական»-ին տեղեկացրել էր, որ ստացել են Պաղեստինի կառավարության վարչապետի շնորհավորագիրը, որով նա ճանաչել էր պատրիարքի ընտրությունը, սակայն այսօր հստակեցրեց, որ պատրիարքին պետք է ճանաչի Պաղեստինի նախագահ Մահմուդ Աբբասը:
Հիշեցնենք, որ Երուսաղեմի հայոց պատրիարք էր ընտրվել պատրիարքարանի Լուսարարապետ Նուրհան արքեպիսկոպոս Մանուկյանը՝ ստանալով 17 կողմ ձայն: Պատրիարքի ընտրությունն անցկացվել էր երկու փուլով. հունվարի 23-ին գաղտնի քվեարկությամբ հինգ թեկնածուներ էին ընտրվել, իսկ հաջորդ օրը նրանցից մեկը` ձայների մեծամասնությամբ: Համաձայն Երուսաղեմի Ուխտի կանոնադրության (1882թ.)՝ պատրիարքի թեկնածու կարող են լինել Սրբոց Հակոբյանց միաբանության երեսունհինգ տարին լրացած վարդապետներն ու եպիսկոպոսները: Հունվարի 25-ին պատրիարքարանում կանոնադրական բարեփոխումների մասին ժողով կգումարվի:
Երուսաղեմի պատրիարքի աթոռը թափուր էր մնացել լուսահոգի ամենապատիվ Տեր Թորգոմ արքեպիսկոպոս Մանուկյանի (1990-2012) վախճանից հետո:
