«Հո՞ մենթ չես, արի տղավարի խոսանք». Օշականցի երիտասարդը ծեծել է ոստիկանին. «Փաստինֆո»

Իշխանության ներկայացուցչին քաշքշելու ու հարվածելու համար Արագածոտնի մարզի 22-ամյա բնակիչ Արշակունի Թովմասյանը դատապարտվել է 6 ամիս ժամկետով ազատազրկման: Այս մասին հայտնում է «Փաստինֆո»-ն:

Ըստ մեղադրանքի՝ Արշակունի Թովմասյանը գտնվելով ալկոհոլային հարբածության վիճակում  2014թ. դեկտեմբերի 14-ին ժամը 05-00-ի սահմաններում Օշական գյուղի Նալբանդյան փողոցի վերջնամասում ոստիկանության աշխատակից Լևոն Մարգարյանի հետ վիճաբանության մեջ է մտել, դրսևորել հանդգնություն, քաշքշել, ձեռքերով հարվածել Լ.Մարգարյանի դեմքին, մարմնի տարբեր մասերին, պատճառելով մարմնական թեթև վնասվածքներ:

Արշակունի Թովմասյանին մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով, և նրա նկատմամբ որպես խափանման միջոց է ընտրվել կալանավորումը:

Ամբաստանյալն իրեն առաջադրված մեղադրանքում մեղավոր չի ճանաչել և ցուցմունք է  տվել այն մասին, որ դեպքի օրը եղբոր տանից դուրս է եկել և քայլել դեպի տուն: Դեռևս տուն չհասած, իր կողքին կանգնել է մի մեքենան, որի ուղևորը մեքենայից կոպիտ տոնով հարցրել է  «ով ես, ուր ես գնում»:

Ինքը հարցից զայրանալով պատասխանել է հարցով՝  «հո՞ մենթ չես»: Ավտոմեքենայի ուղևորը դուրս գալով ավտոմեքենայից մոտեցել է իրեն և ասել, թե «միլիցեն ինչ կապ ունի, արի տղավարի խոսենք»:

Վիճաբանություն է ծագել, քաշքշել են իրար, որի հետևանքով ընկել են գետնին, իսկ երբ իրենց է մոտեցել նշված ավտոմեքենայի վարորդն ամբաստանյալը նկատել է, որ ինչպես վարորդը, այնպես էլ իր հետ վիճաբանողը ոստիկանական բաճկոնով են, դադարեցրել է քաշքշուկը և հեռացել դեպի տուն, իսկ առավոտյան, ինքնակամ ներկայացել է ՀՀՈ Աշտարակի բաժին:

Ամբաստանյալը հայտնել է նաև, մթության պատճառով չի տեսել, որ ավտոմեքենայի մեջ գտնվողները ոստիկանության աշխատակիցներ են և որ իրեն մոտեցած անձը չի ներկայացել որպես ոստիկանության աշխատակից, հակառակ դեպքում ոստիկանի հետ չէր վիճաբանի ու նրա հետ քաշքշուկի մեջ չէր մտնի:

 

Մանրամասները՝ սկզբնաղբյուր կայքում