ՀՀ նախագահ Սերժ Սարգսյանը Չինաստան կատարած պետական այցի, ՉԺՀ նախագահ Սի Ծինփինի հետ բանակցությունների արդյունքներով ստորագրեց «Հայաստանի Հանրապետության և Չինաստանի Ժողովրդական Հանրապետության բարեկամական համագործակցության հարաբերությունների հետագա զարգացման և խորացման մասին» համատեղ հռչակագիրը:
Հռչակագիրն իրենից ենթադրում է ոչ միայն հայ-չինական տնտեսա-քաղաքական և մշակութային համագործակցություն, այլ նաև ռազմական:
Հայաստանի ռազմավարական գործընկեր Ռուսաստանին այս փաստը բոլորովին չի անհանգստացնում: «Առաջին լրատվական»-ի հետ զրույցում նման տեսակետ հայտնեց Ռազմական կանխատեսման կենտրոնի տնօրեն, ռուսաստանցի ռազմական փորձագետ Անատոլի Ցիգանոկը:
Նրա խոսքերով՝ եթե հայ-չինական ռազմական համագործակցությունը սկսված լիներ մոտավորապես 10 տարի առաջ, երբ Ռուսաստանը Չինաստանի հետ կոնֆլիկտային հարաբերություններ ուներ, ապա դա Ռուսաստանին կանհանգստացներ: «Բայց այժմյան իրավիճակում, մանավանդ` սկսած երևի թե անցած տարվանից, երբ Չինաստանն, ըստ էության, չպաշտպանեց Արևմուտքին, մենք ոչ մի խնդիր չենք տեսնում, որ Հայաստանն էլ հիմա համագործակցի Չինաստանի հետ»,- ասաց Ցիգանոկը:
Մեր այն հարցին, թե Ռուսաստանը դեմ չի՞ լինի նաև այն հանգամանքին, որ տարածաշրջանում, Արևմուտքից ու Ռուսաստանից բացի, հայտնվի մեկ այլ՝ երրորդ խաղացող, Անատոլի Ցիգանոկն արձագանքեց․«Սկզբունքորեն` ոչ: Այն հայտարարությունը, որ եղավ հայկական մամուլում` հայ-չինական համագործակցության հետ կապված, մենք դրական ենք համարում, և լավ կլինի, որ այդ համագործակցությունը իսկապես լինի: Մենք կարծում ենք, որ անհանգստանալու շատ բան չունենք»,- ընդգծեց մեր զրուցակիցը:
Փորձագետը հավելեց, որ Հայաստանը մնում է Ռուսաստանի ռազմավարական գործընկերը, և այս համագորակցությամբ ոչ մի բան չի փոխվում: « Հավելյալ համաձայնությունները միայն օգուտ են Հայաստանին, մանավանդ` այն դեպքում, երբ Ռուսաստանն այդ երկրի հետ սկզբունքային խնդիրներ չունի, առճակատման մեջ չէ»:
Ցիգանոկը հավելեց, որ Հարավայաին Կովկասում, բացի ՀԱՊԿ-ից, նաև ՆԱՏՕ-ն էական նշանակություն ունեցող կառույց է, քանի որ Վրաստանն ու Ադրբեջանը հիմա հետաքրքրված են այդ միությանն անդամակցությամբ: «Թեպետ ես կարծում եմ, որ ո՛չ Վրաստանը, ո՛չ էլ Ադրբեջանը ՆԱՏՕ-ի անդամ չեն դառնա, որովհետև Ռուսաստանը հիմա տարածքային վեճ ունի Վրաստանի հետ, Ադրբեջանն էլ իր վզին՝ Ղարաբաղյան հակամարտությունը: ՆԱՏՕ-ին դա բնավ պետք չէ: Ուրեմն ի՞նչ խնդիր կա, որ հայտնվի երրորդը, որը Ռուսաստանի հետաքրքրություններին չի հակասում»,- ասաց փորձագետը:
