Այսօր Ախալքալաքի շրջանային վարչության շենքի դիմաց «Վրացական երազանքի» անդամները անցկացրել են խաղաղ բողոքի ցույց շրջանային ժողովի և վարչության նախագահների հրաժարականների պահանջով:
«Հարավային դարպասը»-ը հայտնում է,որ ժամը 12:00-ի սահմաններում մոտավորապես 150 – 200 մարդ հավաքվել է Ախալքալաքի շրջանային վարչության շենքի դիմաց «Վրացական երազանքի» դրոշներով և ցուցապաստառներով: Ցուցարարների մեծամասնությունը շրջանի գյուղերից էին եկել:
Ցուցարարները պահանջում են Վրաստանի նախագահ՝ Միխել Սահակաշվիլու, Ախալքալաքի և Նինոծմինդայի շրջաններից ընտրված մեծամասնական պատգամավորներ Սամվել Պետրոսյանի և Հենզել Մկոյանի, ինչպես նաև Ախալքալաքի շրջանային ժողովի և վարչության նախագահների՝ Համլետ Մովսիսյանի և Նաիրի Իրիցյանի հրաժարականները:
Ներկաներին իրենց տեսակետները բարձրախոսով ներկայացրել է մեկ տասնյակից ավելի «Վրացական երազանքի» ներկայացուցիչներ, ովքեր իրենց ելութներում անդրադարձան Ախալքալաքում տիրող իրավիճակի մասին՝ սկսած դպրոցներից, հիվանդանոցից, լեզվական խնդիրներից մինչև արդեն նախկին իշխանության «Ազգային շարժման» վարած քաղաքականությունը:
Հավաքվածներին դիմել է Վրաստանի խորհրդարանի պատգամավոր Գ.Ժվանիան: Նա իր խոսքում նշեց, որ 2012-ի հոկտեմբերին կատարվել է ճիշտ ընտրություն, և մարդիկ պետք է ամեն ինչ անեն որ առողջ հասարակություն ձևավորվի: Ինչպես նաև հավելեց, որ Բիձինա Իվանիշվիլին նախընտրական շրջանում տված խոստումները կամաց-կամաց իրականություն է դարձնում և անպայման Ախալքալաքում կբացվի հայ-վրացական համալսարան, որը ընդունվեց ծափողջյուններով:
Իսկ Մելիք Ռաիսյանն իր խոսքում նշել է, որ իրենք այսօր «խնամախոս» են եկել և քաղաքակիրթ ձևով պահանջում են շրջանային ժողովի և վարչության նախագահների հրաժարականը և մեկ շաբաթ ժամանակ են տալիս:
Ցուցարարները Ախալքալաքի բողոքի ցույցից հետո շարժվել են Նինոծմինդա, որտեղ անցկացնելու էին նման միջոցառում:
