«Առաջին լրատվական»-ի զրուցակիցն է «Ազգային անվտանգություն» կուսակցության նախագահ Գառնիկ Իսագուլյանը:
-Գագիկ Ծառուկյանի փեսան` Կարապետ Գուլոյանը նշանակվեց Կոտայքի մարզպետ, ինչպես եք նշանակմանը վերաբերվում` հատկապես հաշվի առնելով այն, որ պարբերաբար ասվում էր, որ Ծառուկյանի դեմ են իշխանությունները գործում , հետապնդում են, նշանակումը գործա՞րք էր:
-Կուզենայի, որ ավանդույթ դառնար հետևյալը, որ յուրաքանչյուր մարդ ապահովագրված չէ սխալվելուց, խոսքս ամենևին Գագիկ Ծառուկյանի մասին չէ, ընդհանրապես որևէ քաղաքական գործիչ, որևէ գործարար աշխարհի ներկայացուցիչ և ընդհանրապես յուրաքանչյուր ՀՀ քաղաքացի: Ցավոք սրտի, մեզ մոտ ավանդույթ կար, որ նման պարագաներում, եթե պատժում էին մեկին, որն իրենից արժեք էր ներկայացնում և ուներ որոշակի դիրք, անմիջապես սկսում էին նաև հետապնդումները հարազատների և, ինչու չէ, նաև մտերիմների նկատմամբ, նրանց նկատմամբ, ովքեր համարձակվում էին բարևել և զրուցել այդ մարդու հետ. գործից ազատում էին, կամ այլ ճնշումներ կիրառում:
Հիմա, անկախ նրանից , թե Փետրվարի 12-ից հետո ինչ տեղի ունեցավ և ինչ գործընթացներ տեղի ունեցան ՀՀ-ում , չնայած նրան, որ ես ասել ու կրկնում եմ, որ դա ուղղված էր Գ. Ծառուկյանի դեմ,բայց եթե հիմա իշխանությունները գտել են , որ դա ամենևին չպետք է ազդի նրա շրջապատի, հարազատների, այդ թվում նաև Աբովյանի նախկին քաղաքապետի հետագա աշխատանքի ու նրա բարձրացման գործընթացի վրա, ապա ես սա միանշանակ համարում եմ դրական երևույթ:
Այսինքն, մարդուն չպետք է գնահատել այն տեսանկյունից , թե ում բարեկամն է , նրա նկատմամբ ինչ վերաբերմունք կա , այլ պետք է գնահատել սեփական աշխատանքների տիրույթում և եթե գտել են, որ պետք է նշանակել մարզպետ, ես այդեղ որևէ արտառոց բան չեմ տեսնում : Ամենևին գործարքի խնդիր չկա, իշխանությունների վարքագծի փոփոխություն է: Ծանոթ լիլնելով ՀՀԿ-ի խոհանոցին կարող եմ ասել, որ նշանակումը Սերժ Սարգսյանի ցանկությամբ է եղել:
Հարցազրույցն ամբողջությամբ՝ տեսանյութում
