Վրաստանի Չիատուրա քաղաքում մեծամասշտաբ գործադուլ են հայտարարել հանքափորները: Վրացական ԶԼՄ-ների տեղեկություններով՝ փակ են 5 հանքավայր ու 7 վերամշակող գործարան:
Բացի գործադուլից՝ 8 հանքափոր, ի նշան բողոքի, հրաժարվում են դուրս գալ հանքահորից՝ տեղեկացնում է Չիատուրա քաղաքի պատգամավոր Մալխաս Ծերեթելին:
Նրա տեղեկությունների համաձայն՝ հանքափորները առաջ են քաշում 3 հիմնական պահանջ, մասնավորապես՝ պահանջում են ավելացնել արձակուրդային օրերի թիվը՝ 28-ից դարձնելով 48, ավելացնել նաև հանգստյան օրերի ու վճարովի հիվանդանոցային օրերի թիվը:
Հանքափորները հայտարարում են, որ ավելի վաղ ղեկավարությունը իրենց խոստացել է լուծել այդ խնդիրները, սակայն խոստումը չի կատարել:
Դեռ հայտնի չի, թե որքան կտևի հանքափորների գործադուլը, սակայն լրագրողների հետ զրույցում նրանք նշել են, որ գործադուլը կշարունակվի այնքան ժամանակ, մինչև իրենց պահանջները լիովին բավարարվեն:
