Աուտիզմի իրազեկման համաշխարհային օրը՝ ապրիլի 2-ին, Երևանի քաղաքապետ Տարոն Մարգարյանը ՀՀ առաջին տիկին Ռիտա Սարգսյանի հետ միասին ներկա է գտնվել «Իմ ուղին» ուսումնավերականգնողական կենտրոնի նոր շենքի հանդիսավոր բացմանը, որի նպատակն է աջակցել աուտիզմ և զարգացման այլ խանգարումներ ունեցող անձանց և նրանց ընտանիքներին: Միջոցառմանը ներկա են եղել նաև ՀՀ կրթության և գիտության, ՀՀ աշխատանքի և սոցիալական հարցերի, ՀՀ առողջապահության նախարարները, պաշտոնատար այլ անձինք և բազմաթիվ հյուրեր: Շնորհավորելով ներկաներին կենտրոնի նոր ու հարմարավետ շենքի բացման առթիվ` քաղաքապետ Տարոն Մարգարյանը մեկ անգամ ևս ընդգծել է, որ քաղաքապետարանն իր լիազորությունների շրջանակում շարունակելու է աջակցել կենտրոնին:
«Սրտացավ մի խումբ մարդկանց, կազմակերպությունների և անձամբ տիկին Սարգսյանի անմիջական հետևողականության արդյունքում կարճ ժամանակահատվածում կենտրոնի նոր շենքն արդեն պատրաստ է լիարժեք շահագործման: Շնորհավորելով կենտրոնի սաներին և ծնողներին` իմ շնորհակալությունն եմ հայտնում Աուտիզմի ազգային հիմնադրամին, անձամբ Ձեզ, տիկին Սարգսյան, ինչպես նաև այն ներդրողներին, կազմակերպիչներին ու բարերարներին, ովքեր աջակցեցին և օգնեցին ծրագիրը արագ կյանքի կոչելու հարցում: Որպես Երևանի քաղաքապետ՝ ուզում եմ նաև վստահեցնել, որ մենք միշտ լինելու ենք կենտրոնի կողքին և մեր լիազորությունների շրջանակում աջակցելու ենք», – ընդգծել է քաղաքապետը:
Հանդիսավոր արարողության շրջանակում քաղաքապետ Տարոն Մարգարյանը նաև «Իմ ուղին» ուսումնավերականգնողական կենտրոնի տնօրենին է հանձնել կենտրոնի տարածքի ընդլայնման վերաբերյալ ՀՀ կառավարության որոշումը:
«Դեռևս մեկ տարի առաջ, երբ այցելեցինք կենտրոնի նոր շենքի շինարարության ընթացքին տեղում հետևելու, ծնողների և կենտրոնի պատասխանատուների հետ հանդիպման ժամանակ վերջիններս ցանկություն հայտնեցին, որպեսզի հնարավորության դեպքում տարածքն ընդլայնվի: Դեռ այն ժամանակ մենք խոստացանք, որ հարցը կներկայացնենք հանրապետության վարչապետին և կքննարկենք կառավարության հետ: Եվ այսօր մենք արդեն ունենք այդ համաձայնությունն ու սիրով կենտրոնի տնօրենին ենք հանձնում ընդլայնման համապատասխան որոշումը», – նշել է Երևանի քաղաքապետը:
«Իմ ուղին» ուսումնավերականգնողական կենտրոնի կայացման գործում անգնահատելի ներդրման համար քաղաքապետ Տարոն Մարգարյանն արժանացել է «Աուտիզմի ազգային հիմնադրամ» բարեգործական կազմակերպության շնորհակալագրի:
Կենտրոնի նոր շենքի հանդիսավոր բացման պատիվը վերապահվել է Երևանի քաղաքապետ Տարոն Մարգարյանին, ՀՀ կրթության և գիտության նախարար Արմեն Աշոտյանին և Հայկական բարեգործական ընդհանուր միության նախագահ Պերճ Սեդրակյանին:
Հարկ է նշել, որ դեռևս 2012թ.-ի ապրիլի 2-ին՝ Աուտիզմի իրազեկման համաշխարհային օրը, Հայաստանի Հանրապետության առաջին տիկնոջ՝ Ռիտա Սարգսյանի նախաձեռնությամբ և նախագահությամբ ստեղծվեց «Աուտիզմ ազգային հիմնադրամ»: Նույն թվականին Երևանի քաղաքապետարանի կողմից հիմնադրամին տրամադրվեց շենք Գյուրջյան 13 հասցեում, որը քաղաքապետարանի, ՀՀ կրթության և գիտության նախարարության ու Հայկական բարեգործական ընդհանուր միության միջոցներով հիմնովին վերանորոգվեց:
