Կառավարությունը պատրաստվում է առաջիկայում «Նաիրիտ» գործարանի աշխատակիցների՝ տարիներով չվճարված աշխատավարձը մարելու նպատակով վաճառքի հանել ոչ միայն գործարանի քացախաթթվի արտադրամասի սարքավորումները, այլև կաուչուկի արտադրամասի՝ «Կապույտ լիճ» կոչվող տեղամասի խողովակաշարերից մեկը: Այս մասին «Առաջին լրատվական»-ի հետ զրույցում ասաց «Նաիրիտ» գործարանի մամուլի նախկին խոսնակ, ներկայումս ակցիաները համակարգող խմբի անդամ Անուշ Հարությունյանը: Նա նշեց, որ այդ մասին իրենց տեղեկացրել է էներգետիկայի նախարար Երվանդ Զախարյանը այսօր համատեղ հանդիպման ժամանակ:
Կաուչուկի արտադրության համար կարևոր է ջրի պաշարը, իսկ այդ խողովակաշարը ապահովում էր այդ պաշարը, որից երկու հատ է, իսկ վաճառքի հանվածը շատ հին է: Հետևաբար, եթե գործարանը վերագործարկվի, այդ խողովակաշարի վաճառքը խնդիր չի առաջացնի:
Հնարավո՞ր է այլ միջոցներ գտնել գործարկման համար: «Դա խնդիր չէ, և խնդիրն այլ. այդ խողովակաշարի վաճառքից առաջացած գումարով հնարավոր չի լինի 15 միլիոն աշխատավարձային պարտք փակել: Այդ գումարով հնարավոր կլինի փակել միայն 1, առավելագույնը 1.5 ամսվա պարտք: Իսկ թե որքանով է տրամաբանական 1.5 ամսվա պարտքը փակելու համար խողովակաշար վաճառել՝ չգիտեմ: Դա ընդամենը կարող է 15-օրյա ընդմիջում տալ ակցիաներին, որից հետո մարդիկ նորից գումար են պահանջելու: Բայց դա ևս, որպես այդպիսին, նաիրիտցիների խնդիրը չէ: Մեզ մեր պարտքն է հետաքրքրում»,- ասաց Անուշ Հարությունյանը:
Վերջինս նշեց, որ նախարարն իրենց հետ հանդիպման ժամանակ ոչ մի հստակ բան, ժամկետ, գումարի չափ չի նշել: «Նա միայն ասում է, թե ինչ միջոցներով է հնարավոր փակել պարտքը, ինչ միջոցներ կարող է գտնել վճարելու համար, բայց նա չի կարող քաղաքական որոշում կայացնել վարչապետի ու նախագահի փոխարեն: Իսկ բյուջեից մեր պարտքերը վճարելը քաղաքական որոշում է, որը պետք է կայացնեն երկրի բարձրագույն ղեկավարները: Բայց նրանք մեզ հետ չեն հանդիպում, և ստացվում է, որ մարդկանց հենց այնպես օդից կախված վիճակում պահում են, որը շատ նվաստացուցիչ է և վրդովեցնող»,- նկատեց մեր զրուցակիցը՝ ավելացնելով, որ նախարարը հրաժարվել է անգամ ժամկետ նշել, թե հաջորդ ամսվա աշխատավարձը երբ կտան:
«Նախարարն ասաց, որ մինչև հիմա աշխատավարձերը վճարվում էին էներգետիկ համակարգից, բայց հիմա այդ համակարգում էլ փող չկա, և նույնիսկ մեկ ամսվա գումար էլ չեն կարող վճարել: Հետևաբար պարտքերը կարող են մարվել միայն «Նաիրիտի» հաշվին, երբ գույքը կվաճառվի»:
Մեր զրուցակցի խոսքով, սակայն, պետությունը, պատկան մարմինները չեն կարող նման անտարբերություն ցուցաբերել նաիրիտցիների նկատմամբ, քանի որ նույն պետությունը 5 միլիարդ դրամի պարտք ունի «Նաիրիտին», որը գոյացել է ժամանակին կաուչուկի մի հոսքագիծը Չինաստանին վաճառելու գործարքից ու մինչ օրս չի տրվել գործարանին: Այն դեպքում, երբ անգամ դատարանի որոշում կա, որ այդ գումարը պետք է վերադարձվի գործարանին:
«Այդ 5 միլիարդը կազմում է մեր պարտքի 90 տոկոսը: Այսինքն՝ այդ գումարի վերադարձի պայմաններում գոնե ամբողջ բանվորական հատվածի պարտքը պարզապես կփակվի: Բայց պետությունը «Նաիրիտի» նկատմամբ իր պարտավորություններն ընդհանրապես չի կատարում: Գումար չի տալիս, աշխատավարձ չի տալիս և միայն պահանջում է սպասել: Իրենք էլ նշում են, որ «Նաիրիտն» էլ պետությանն է 30 միլիարդ պարտք ու կրկին առաջարկում են սպասել»,- ասաց Հարությունյանը:
Մեր զրուցակցի խոսքով՝ եթե պետությունը շարունակի նման արհամարհական վերաբերմունք ցուցաբերել նաիրիտցիների հանդեպ, ապա 5 ամիս անց փողոցում էլ նաիրիտցի չի լինի, բոլորը պարզապես կհեռանան Հայաստանից: «Սա՞ է իրենց ուզածը: Թող ասեն՝ իմանանք, էլի»,- եզրափակեց մեր զրուցակիցը:
Լուսանկարը` PAN Photo-ի
