1935թ. այս օրը Ահնիձոր գյուղում ծնվեց հայտնի գրող, արձակագիր, կինոսցենարիստ Հրանտ Մաթևոսյանը:
1952թ. տեղափոխվել է Երևան, սովորել Կիրովականի (այժմ՝ Վանաձոր) մանկավարժական ինստիտուտում, ապա՝ 1958-1962թթ. Երևանի մանկավարժական ինստիտուտի պատմալեզվաբանական ֆակուլտետում: 1966-1967թթ. հաճախել է Մոսկվայի բարձրագույն կինոսցենարական կուրսերին, 1965-1967թթ. մասնակցել Մոսկվայի բարձրագույն սցենարական դասընթացներին:
Գրական ասպարեզ է իջել 1961թ. լայն արձագանք գտած «Ահնիձոր» ակնարկով: Նախասիրած ժանրը վիպակն է, գրել է պատմվածքներ, վիպակններ, էսսեներ, հրապարակախոսական հոդվածներ, սցենարներ ու կինոսցենարներ: ՍՍՀՄ գրողների միության անդամ է դարձել 1964-ից: 1995-2000թթ. Հայաստանի գրողների միության նախագահն էր:
Գրել է «Մենք ենք մեր սարերը» (1962թ.), «Բեռնաձիեր» (1974թ.), «Տաշքենդ» (1982թ.), «Աշնան արև» (1973թ.), «Խումհար» վիպակները, «Տերը» կինովիպակը, պատմվածքներ, պիեսներ, որոնք 1967-ից ի վեր, տարբեր հավաքածուներ դառնալով, բազմիցս հրատարակվել են տարբեր լեզուներով: 1994թ. Փարիզի «Ալբին Միշել» հրատարակչությունը տպագրում է Հր. Մաթևոսյանի ընտրանին՝ «Աշնան արև» խորագրով:
Նրա սցենարներով նկարահանվել են «Մենք ենք մեր սարերը», «Աշնան արև», Տերը», «Այս կանաչ-կարմիր աշխարհը» կինոնկարները, նրա գործերի նյութերով՝ «Օգոստոս» կինոնկարը, հեռուստատեսային բեմականացումներ են դարձել Մաթևոսյանի «Մեծամոր» էսսեն և «Չեզոք գոտի» պիեսը, Երևանի դրամատիկական թատրոնում բեմականացվել են «Աշնան արևը» և «Կայարանը»:
1967թ. արժանացել է «Դրուժբա նարոդով» ամսագրի մրցանակի, 1984թ. Գրականության ՀԽՍՀ պետական մրցանակի, 1984թ. Գրականության ԽՍՀՄ պետական մրցանակի, ՀՀ «Մեսրոպ Մաշտոց» շքանշանի ասպետ է (1996թ.):
Ստեղծագործությունները թարգմանվել և հրապարակվել են ռուսերեն, անգլերեն, ֆրանսերեն, գերմաներեն, լիտվերեն, մոլդովերեն, էստոներեն, վրացերեն, ղազախերեն, ուկրաիներեն, չեխերեն, հունգարերեն և այլ լեզուներով:
Մահացել է 2002թ. դեկտեմբերի 18-ին Երևանում:
