Իսրայելական Mignews.com կայքի փոխանցմամբ, 2007 թվականի փետրվարի 16-ին Ադրբեջանում Իսրայելի դեսպան Արթուր Լենկը հանդիպում է ունեցել Ադրբեջանում ԱՄՆ դեսպան Էնն Դերսեի հետ:
Այս հանդիպման բովանդակությունն էլ ի վերջո արտացոլվել է WikiLeaks-յան հրապարակումներից մեկում:
Հանդիպման ժամանակ Լենկն ամերիկյան դեսպանին պատմել է Դավոսի տնտեսական ֆորումից ժամանակ Իսրայելի արտգործնախարար Ցիպի Լիվնիի ու Ադրբեջանի նախագահ Իլհամ Ալիևի զրույցի մանրամասները:
Լենկը նշել է, որ Իսրայելն ու Ադրբեջանն անվտանգության ոլորտում կնքել են երկու գաղտնի համաձայնագրեր, սակայն չի մանրամասնել դրանց բովանդակությունը: Նա նաև հայտնել է, որ Ալիևի անձնական խորհրդատուն, բուժման նպատակներով գտնվելով Իսրայելում, հանդիպում է ունեցել Իսրայելի պաշտպանության փոխնախարար Էֆրաիմ Շեհի և «Մոսսադ»-ի ներկայացուցիչների հետ:
Նշվում է, որ Իսրայելը սերտ դիվանագիտական ու տնտեսական հարաբերություններ է հաստատել Ադրբեջանի հետ, որն ունի կարևոր ռազմավարական դիրք և օժտված է նավթի մեծ պաշարներով:
Հիշեցնենք, որ WikiLeaks-յան բացահայտումներում նշված էր այն մասին, որ Ադրբեջանն ու Իսրայելն Իրանը դիտարկում են որպես իրենց անվտանգության գլխավոր սպառնալիք:
