«Հայաստանի էլեկտրական ցանցեր» ընկերության թեման շարունակում է ակտուալ մնալ: Եվ ոչ միայն չվճարումների պատճառով: Հիմա ակտիվորեն քննարկվում է ընկերության վաճառքի հարցը, որովհետև այն իր ներկայիս վիճակով այլևս ընդունակ չէ գոյատևել: Մասնագետներն ասում են, որ ՀԷՑ-ը փրկելու համար պետք է նոր մենեջմենթ, որովհետև կառավարման ներկայիս համակարգը վերափոխել այլևս անհնար է: Իսկ նոր մենջմենթը կապվում է նոր սեփականատիրոջ հետ:
Ո՞վ կարող է լինել ՀԷՑ-ի նոր սեփականատերը: Տեղեկությունները, որ ընկերության ապագա գնորդը կարող է լինել «Տաշիր գրուպը», որի սեփականատերը Սամվել Կարապետյանն է, կարծես չի համապատասխանում իրականությանը: Խնդիրը երևի քաղաքական է և պայմանավորված է Կարապետյանի հայաստանյան ներկայությունը չավելացնելու մտահոգությամբ: Եթե Հայաստանի իշխանությունները թույլ տան, որ Կարապետյանը ձեռք բերի ՀԷՑ-ը, ապա դա նշանակում է էապես ուժեղացնել նրա տնտեսական ազդեցությունը Հայաստանում: Իսկ տնտեսական ազդեցությանը զուգահեռ ավելանալու է նաև նրա քաղաքական ազդեցությունը: Այնպես որ` իշխանությունը չի ցանկանա, ի դեմս Կարապետյանի, ունենալ այնպիսի մրցակից, որը կարող է իրական վտանգ ներկայացնել:
Հենց այս ֆոնին հետաքրքիր է, որ տեղեկություններ են տարածվում, որ ի հայտ է եկել ՀԷՑ-ի նոր գնորդ, որն արաբական ծագում ունի: Խոսքը ԱՄԷ-ում գրանցված ինչ-որ ընկերության մասին է, բայց թե ովքե՞ր են կանգնած այդ ընկերության հետևում, ովքե՞ր են դրա իրական սեփականատերերը, այս պահին հայտնի չէ:
Պարզ է մի բան` ՀԷՑ սեփականատիրոջ փոփոխությունը պետք է կատարվի հնարավորինս արագ, քանի որ այդ կառույցում համարում են, որ մինչև նոր սեփականատիրոջ ի հայտ գալը պետք է տանել այն, ինչ հնարավոր է, պետք է հնարավորինս շատ փող աշխատել, որովհետև հետո դա հնարավոր չի լինի:
