Թբիլիսիում կառավարության շենքի մոտ 21 ոչ կառավարական կազմակերպություններ իրենց բողոքն են արտահայտել «Օկուպացված տարածքների մասին» օրենքում հնարավոր փոփոխություններ կատարելու առնչությամբ:
«Կարծում ենք, որ «Օկուպացված տարածքների մասին» օրենքի մեղմացումը Վրաստանի շահերի ճանապարհին զիջումների գնալու առաջին քայլը կլինի, ինչը կնպաստի տարածքների օկուպացումը ճանաչելու քաղաքականության ձախողմանը»,- հայտարարում են ցուցարարները:
Փետրվարի 7-ին կառավարությունն օրինագծին հավանություն տվեց, ըստ որի «օկուպացված տարածք» մուտքի կանոնների առաջին անգամ խախտման համար կսահմանվի ոչ թե քրեական, այլ վարչական պատասխանատվություն:
Այդ օրինագիծը պետք է ներկայացվի Վրաստանի խորհրդարանի հաստատմանը:
2008 թ. օգոստոսի 8-ին Վրաստանի տարածքում` Հարավային Օսեթիայում սկսվեցին ռազմական գործողություններ: Ավելի ուշ ռուսական զորքը գրավեց Ցխինվալը: Օգոստոսի վերջին Ռուսաստանը ճանաչեց Հարավային Օսեթիայի և Աբխազիայի անկախությունը: Սրան ի պատասխան՝ Վրաստանը խզեց Ռուսաստանի հետ դիվանագիտական հարաբերությունները և երկու չճանաչված պետությունները հայտարարեց «օկուպացված տարածքներ»:
