Եվրոպական Vodafone UK և 3 Austria օպերատորներն այն հաճախորդներին, ովքեր Apple iPhone 4S են օգտագործում, խորհուրդ են տվել չտեղադրել հունվարին թողարկված օպերացիոն համակարգի iOS 6.1 թարմացումը, քանի որ օգտագործողները տեղեկացնում են այդ տարբերակի տեղադրումից հետո առաջացած խնդիրների մասին: Այս մասին է հաղորդում GigaOM կայքը:
«Որոշ հաճախորդներ չեն կարողանում միանալ ցանցին, դժվարություններ են լինում տեքստային հաղորդագորություններ ուղարկելու և ստանալու, իսնչպես նաև համացանցին միանալու ժամանակ»,- ասվում է Vodafone UK-ի տեխնիկական սպասարկման ֆորումում:
ԶԼՄ-ների տեղեկատվության համաձայն, iOS 6.1 տեղադրած որոշ օգտագործողներ նկատել են տրաֆիկների անհամեմատ աճ Microsoft Exchange ծառայության հետ աշխատելուց հետո:
Apple-ը iOS 6.1-ի վերջնական տարբերակը թողարկել է երկու շաբաթ առաջ: Համակարգի ամենամեծ փոփոխությունը LTE բջջային ցանցերի լայնածավալ աջակցությունն է:
iOS-ի նոր տարբերակների թողարկումը հաճախ ուղեկցվում է տարբեր խնդիրների մասին տեղեկատվությամբ, որոնք վերաբերում են Apple-ի շարժական սարքավորումներից օգտվողներին:
