Հետազոտողները պնդում են, որ Մարսի հասարակածային շրջանում շերտային կուտակումների ուսումնասիրությունն իրենց հնարավորություն է տվել հաստատելու ենթադրությունը, որ մի ժամանակ Կարմիր մոլորակի վրա ջուր է եղել: Գիտնականների աշխատանքին նվիրված հոդվածը հրապարակվել է Geological Society of America ամսագրում:
Ապարների շերտային կուտակումները բնորոշ են Մարսի բևեռային շրջաններին, որտեղ դրանց կազմավորումը կապված է եղել մոլորակի բևեռներում շատ ցածր ջերմաստիճանի և օդում մարսյան հողի փոքրագույն մասնիկների առկայության հետ: Մասնիկները դրանց վրա խտացած եղյամի ազդեցությամբ նստվածք են տվել և ձևավորել ռելիեֆը, որը կոչվում է շերտային կուտակումներ:
Գիտնականներն ուսումնասիրել են Մարսի հասարակածային շրջանի այդպիսի կազմավորումները և ենթադրել, որ այդպիսի ռելիեֆ կարող էր ձևավորվել ջրի ստորգետնյա աղբյուրների ազդեցությամբ: Ըստ մասնագետների՝ փոքր կույտերն այն տեղերն են, որտեղ ստորգետնյա աղբյուրների ջուրը դուրս է եկել մակերես, հարթ նստվածքները՝ այն հատվածները, որտեղով հոսել է ջուրը, իսկ հողի՝ ավազաթմբերի նման շերտերը՝ քամուց առաջացած նստվածքները, քամու բերած բարակ փխրուն նյութի կուտակումները:
Հետազոտողները պնդում են, որ ստորգետնյա ջրերը, ամենայն հավանականությամբ, առանցքային դեր են ունեցել Մարսի հասարակածային շերտային կուտակումների ձևավորման գործընթացում:
